وزیراعظم شہباز شریف نے کہا ہے کہ پاکستان خطے میں امن اور استحکام چاہتا ہے، تاہم دفاع کے حوالے سے منہ توڑ جواب دینے کی صلاحیت رکھتا ہے جب کہ ہم دنیا کو بھارت کا مکروہ چہرہ دکھا کر اس کے عزائم سے آگاہ کریں گے۔

ڈان نیوز کے مطابق وزیراعظم شہباز شریف سے پیپلزپارٹی کے چیئرمین بلاول بھٹو زرداری کی قیادت میں پیپلز پارٹی کے وفد نے ملاقات کی ہے۔

وزیراعظم سے ملاقات کرنے والے پیپلز پارٹی کے وفد میں راجا پرویز اشرف، نوید قمر، گورنر خیبرپختونخوا فیصل کریم کنڈی، وزیراعلی سندھ مراد علی شاہ، وزیراعلی بلوچستان سرفراز بگٹی اور سینیٹر سلیم مانڈوی والا شامل تھے۔

حکومت کی جانب سے نائب وزیراعظم و وزیر خارجہ اسحٰق ڈار ، وفاقی وزرا احد خان چیمہ ، محمد اورنگزیب، احسن اقبال، اعظم نذیر تارڑ، عطااللہ تارڑ ، علی پرویز ملک ، ڈاکٹر طارق فضل چوہدری ، رانا مبشر اقبال، مشیر برائے وزیراعظم رانا ثنااللہ ، ڈاکٹر توقیر شاہ ، وزیر مملکت عبدالرحمن کانجو ، وزیراعظم کے معاون خصوصی طلحہ برکی موجود تھے۔

اس موقع پر شہباز شریف کا کہنا تھا کہ پہلگام واقعے کے بعد سے بھارت کا اشتعال انگیز رویہ انتہائی افسوسناک ہے، پاکستان نے نہ صرف واقعے پر تشویش کا اظہار کیا بلکہ واقعے کی غیر جانبدارانہ اور آزادانہ تحقیقات کا بھی کہا۔

انہوں نے کہا کہ بغیر کسی ثبوت کے پاکستان کو واقعے سے جوڑنے کی بھارتی کوششوں کو واضح طور پر مسترد کرتے ہیں۔

ان کا کہنا تھا کہ بھارت کی جانب سے سندھ طاس معاہدے کو غیر قانونی طور معطل کرنا اور اسے آبی جارحیت کے طور پر استعمال کرنا ناقابل قبول ہے کیونکہ پانی پاکستانی عوام کے لیے ریڈ لائن کی حیثیت رکھتا ہے۔

وزیراعظم نے واضح کیا کہ پاکستان خطے میں امن اور استحکام چاہتا ہے، تاہم دفاع کے حوالے سے منہ توڑ جواب دینے کی صلاحیت رکھتا ہے جب کہ پاکستان کی بہادر افواج دشمن کے خلاف ہر دم تیار ہیں، بھارتی جارحیت کے خلاف پوری قوم افواج کے ساتھ کھڑی ہے۔

ان کا کہنا تھا کہ بھارتی جارحیت بے نقاب کرنے کے حوالے سے پاکستان بھرپور سفارتی کوششیں کر رہا ہے اور دنیا کو پاکستان کے نقطہ نظر سے آگاہ کرنے کے لئے میری کئی ممالک کے سفیروں سے ملاقات ہوئی ہے۔

شہباز شریف نے کہا کہ پاکستان اقوام متحدہ کی سیکورٹی کونسل میں بھی اس مسئلہ کو بھرپور طور پر اٹھائے گا تاکہ دنیا کو بھارت کا مکروہ چہرہ دکھائے اور اس کے عزائم سے آگاہ کرے۔

دوسری جانب، پیپلز پارٹی کے وفد نے گفتگو کے دوران کہا کہ پاکستان پیپلز پارٹی سمیت ملک کی تمام سیاسی جماعتیں پاکستان کے دفاع اور حفاظت کے حوالے سے متحد ہیں۔

ان کا کہنا تھا کہ پاکستان کے دفاع کی خاطر ہم پاکستان کی بہادر افواج کے شانہ بشانہ کھڑے ہیں جب کہ وفد نے بھارتی جنگی عزائم دنیا کے سامنے رکھنے پر وفاقی حکومت کی سفارتی کوششوں کی تعریف کی۔

بجٹ پر مشاورت کا آغاز

حکومت نے سب سے بڑی اتحادی جماعت کے ساتھ وفاقی بجٹ پر مشاورت کا آغاز کر دیا، وزیراعظم کا کہنا تھا کہ ہم تمام معاملات میں مشاورت کو ترجیح دیتے ہیں، یہ بجٹ پر مشاورت کا پہلا دور تھا، حکومت کی تشکیل کردہ کمیٹی پیپلز پارٹی کے ساتھ مشاورت جاری رکھے گی۔

وزیراعظم سے ملاقات کے دوران پیپلز پارٹی کے وفد نے وفاقی بجٹ برائے مالی سال 2025-2026 کے حوالے سے تجاویز دیں۔

پاکستان پیپلز پارٹی کے وفد نے حکومت کی توانائی کے شعبے میں اصلاحات پر مکمل اعتماد کا اظہار کیا، ملاقات میں بجلی کی تقسیم کار کمپنیوں کو صوبوں کے حوالے کرنے پر بھی تبادلہ خیال کیا گیا۔

ملاقات میں فیصلہ کیا گیا کہ دو مہینوں میں تقسیم کار کمپنیاں صوبائی حکومتوں کے حوالے کردی جائیں گی۔