پاکستان اور بھارت تحمل، دانش مندی اور ذمہ داری کا مظاہرہ کریں، متحدہ عرب امارات
متحدہ عرب امارات کے نائب وزیر اعظم و وزیر خارجہ شیخ عبداللہ بن زاید النہیان نے بھارت اور پاکستان کو تحمل سے کام لینے اور جاری کشیدگی میں کمی لانے پر زور دیا ہے۔
سرکاری خبر رساں ادارے ’اے پی پی‘ کی رپورٹ کے مطابق متحدہ عرب امارات کی نیوز ایجنسی وام نے بتایا کہ شیخ عبداللہ بن زاید النہیان نے جنوبی ایشیا میں حالیہ کشیدگی پر گہری تشویش کا اظہار کرتے ہوئے بھارت اور پاکستان پر زور دیا ہے کہ وہ تحمل، دانش مندی اور ذمہ داری کا مظاہرہ کریں اور ایسے کسی بھی اقدام سے اجتناب کریں جو علاقائی یا عالمی امن کے لیے خطرے کا باعث بن سکتا ہے۔
شیخ عبداللہ بن زاید نے اپنے بیان میں کہا کہ موجودہ نازک صورتحال میں دونوں ممالک کو اُن آوازوں پر دھیان دینا چاہیے جو سنجیدہ مکالمے اور باہمی مفاہمت کی حمایت کر رہی ہیں۔
ان کے مطابق یہ وقت تنازع نہیں بلکہ مفاہمت کا ہے تاکہ خطے میں کسی ممکنہ عسکری تصادم کو روکا جا سکے اور جنوبی ایشیا میں پائیدار استحکام کو فروغ دیا جا سکے۔
متحدہ عرب امارات کے نائب وزیر اعظم نے واضح کیا کہ سفارت کاری اور بات چیت ہی ایسے بحرانوں کے پُرامن حل کا موثر ذریعہ ہیں اور یہی راستہ قوموں کو امن، استحکام اور ترقی کے مشترکہ اہداف کی طرف لے جاتا ہے۔
انہوں نے اس عزم کا اعادہ کیا کہ متحدہ عرب امارات، اپنی روایتی غیر جانبدارانہ خارجہ پالیسی کے تحت، نہ صرف علاقائی و بین الاقوامی تنازعات کے پُرامن حل کی کوششوں کی حمایت جاری رکھے گا بلکہ ان کے انسانی اثرات کو کم کرنے میں بھی بھرپور کردار ادا کرے گا۔
لائیو ٹی وی