آسٹریلوی کھلاڑیوں کا آئی پی ایل کیلئے دوبارہ بھارت نہ جانے کا فیصلہ
پاکستان سپر لیگ (پی ایس ایل) کی جانب سے اپنے غیر ملکی کھلاڑیوں کو دبئی میں روکنے کے بعد انڈین پریمیئر لیگ (آئی پی ایل) انتظامیہ نے بھی اپنے کھلاڑیوں کو روکنے کا فیصلہ کرلیا ہے تاہم آسٹریلوی کھلاڑی لیگ کھیلنے دوبارہ بھارت نہیں جائیں گے۔
بھارتی میڈیا رپورٹس کے مطابق آئی پی ایل کا مستقبل تاحال غیر یقینی کا شکار ہے تاہم بھارتی بورڈ نے جنگ بندی کے بعد فرنچائزز کو ہدایت کی ہے کہ وہ اپنے غیر ملکی کھلاڑیوں کو روک لیں۔
پاک بھارت کشیدگی کے باعث انڈیا میں موجود آسٹریلیا کے کرکٹرز شدید صدمے میں ہیں اور اب جب چونکہ ممالک کے درمیان جنگ بندی ہوچکی ہے اور آئی پی ایل کے دوبارہ شروع ہونے کے امکانات روشن ہیں۔
ایسے میں آسٹریلوی کھلاڑی آئی پی ایل کھیلنے کے واپس بھارت جانے سے انکار کرسکتے ہیں۔
سن رائزرز حیدرآباد، راجستھان رائلز اور چنئی سپر کنگز پلے آف کی دوڑ سے باہر ہو چکی ہیں، ان کے صرف ایک یا دو میچز باقی ہیں اور آسٹریلیا کے کپتان پیٹ کمنز، ٹریوس ہیڈ اور نیتھن ایلس ان ٹیموں سے وابستہ ہیں۔
تاہم، مچل اسٹارک، مچل مارش، جوش انگلس، مارکس اسٹوئنس، جوش ہیزل ووڈ اور دیگر کئی کھلاڑی ایسی ٹیموں کا حصہ ہیں جو اگلے مرحلے کی دوڑ میں شامل ہیں اور ممکنہ طور پر فائنل بھی کھیل سکتی ہیں۔
یاد رہے کہ 8 مئی کو پنجاب کنگز اور دہلی کیپیٹلز کے درمیان دھرم شالہ میں کھیلا جانے والا میچ 10.2 اوورز کے بعد فلڈ لائنٹس بند کرنے کے بہانے میچ معطل کر دیا تھا۔
ابتدا میں فلڈ لائٹس کی بندش کو تکنیکی خرابی سمجھا گیا، لیکن جب کھلاڑیوں اور انتظامیہ کو پاکستان کی جانب سے جوابی کارروائی میں فضائی حملے کے خطرات کے بارے میں آگاہ کیا گیا تو صورتحال تیزی سے بگڑ گئی۔
ایک کھلاڑی نے ’انڈین ایکسپریس‘ کو بتایا کہ دونوں ٹیموں میں خوف تھا اور غیر ملکی کھلاڑی خاص طور پر اپنی حفاظت کے بارے میں فکر مند تھے۔ آسٹریلوی میڈیا نے پہلے رپورٹ کیا تھا کہ ان کے کھلاڑیوں نے بھی اپنی حفاظت کے بارے میں تشویش کا اظہار کیا اور وہ گھر واپس جانا چاہتے تھے۔
بھارتی کرکٹ بورڈ کے کے سیکریٹری دیواجیت سیکیا نے گزشتہ رات کرک بز سے بات کرتے ہوئے کہا ’بی سی سی آئی حالات کا بغور جائزہ لے رہی ہے اور جیسے جیسے صورتحال واضح ہوگی، ہم آئی پی ایل کے دوبارہ آغاز سے متعلق فیصلہ تمام اسٹیک ہولڈرز اور متعلقہ حکومتی اداروں سے مشاورت کے بعد کریں گے‘۔
دوسری جانب، سڈنی مارننگ ہیرالڈ کے مطابق کچھ کھلاڑی اس وقت بھی پریشان ہیں اور یقین سے نہیں کہہ سکتے کہ وہ دوبارہ بھارت جائیں گے یا نہیں۔
رپورٹ میں بتایا گیا کہ اگر کوئی کھلاڑی سیکیورٹی خدشات کے باعث انڈین پریمیئر لیگ (آئی پی ایل) میں واپسی سے انکار کرتے ہیں تو انہیں کرکٹ آسٹریلیا کی مکمل حمایت حاصل ہوگی۔
ادھر، اطلاعات ہیں کہ انگلینڈ اینڈ ویلز کرکٹ بورڈ (ای سی بی) آئی پی ایل کے باقی میچز برطانیہ میں کروانے کے امکانات کا جائزہ لے رہا ہے۔
لائیو ٹی وی