وزیراعظم کی نواز شریف سے ملاقات، آپریشن بنیان مرصوص کی کامیابیوں سے آگاہ کیا
وزیراعظم شہباز شریف نے مسلم لیگ (ن) کے صدر اور سابق وزیراعظم نواز شریف سے ملاقات کی جس میں انہیں ’آپریشن بنیان مرصوص‘ کی کامیابیوں سے آگاہ کیا۔
ڈان نیوز کے مطابق وزیراعظم شہباز شریف اور مسلم لیگ (ن) کے سینیٹر عرفان صدیقی نے پارٹی صدر نواز شریف سے الگ الگ ملاقاتیں کیں۔
شہباز شریف نے نواز شریف کو ملک کی مجموعی صورتحال سمیت آپریشن بنیان مرصوص کی کامیابیوں سے بھی آگاہ کیا۔
دوسری جانب، سینیٹر عرفان صدیقی نے مسلم لیگ (ن) کے صدر کو پارلیمانی پارٹی کی کارکردگی رپورٹ پیش کی۔
اس موقع پر سابق وزیراعظم کا کہنا تھا کہ ہماری بہادر مسلح افواج نے انتہائی پیشہ وارانہ مہارت سے وطن کا دفاع کیا، قومی سلامتی کے لیے سیاسی تقسیم بھلا کر ایک ہونا خوش آئند اقدام ہے۔
انہوں نے کہا کہ پاکستان کی پارلیمنٹ نے بھی نہایت مثبت اور توانا کردار ادا کیا۔ نواز شریف نے پاکستانی میڈیا کو بھی خراج تحسین پیش کیا۔
ان کا مزید کہنا تھا کہ اس فتح پر ہم اللہ تعالیٰ کے شکر گزار ہیں۔
لائیو ٹی وی