نوشکی میں پولیو ٹیم پر فائرنگ سے پولیس اہلکار شہید، ٹانک سے 2 پولیو ورکر اغوا
نوشکی میں پولیو ٹیم پر فائرنگ سے پولیس اہلکار شہید ہوگیا جبکہ ٹانک میں پولیو مہم میں مصروف 2 پولیو ورکرز کو اغوا کرلیا گیا۔
ڈان نیوز کے مطابق نوشکی کے علاقے کلی محمد حسنی میں پولیو ٹیم پرفائرنگ کی گئی جس کے نتیجے میں پولیس اہلکار شہید ہوگیا۔
پولیس کے مطابق شہید اہلکار کی لاش کو ہسپتال منتقل کردیا گیا ہے جبکہ ملزمان کی تلاش جاری ہے۔
دوسری جانب ڈان اخبار میں شائع رپورٹ کے مطابق ضلع ٹانک کے علاقے میں مسلح حملہ آوروں نے 2 پولیو ورکرز کو اغوا کر لیا۔
پولیو ورکرز ٹانک کے علاقے دولات کورنا میں جاری ویکسی نیشن مہم کے ایک حصے کے طور پر اپنی ذمہ داریاں انجام دے رہے تھے، مغوی ورکرز کی شناخت یونین کونسل کے اہلکار صفت خان اور ان کے ساتھی حزب اللہ کے طور پر ہوئی۔
پولیس ذرائع کے مطابق دونوں ہیلتھ ورکرز ڈیوٹی پر تھے کہ نامعلوم مسلح افراد نے انہیں اغوا کر لیا اور نامعلوم مقام پر لے گئے۔
واقعے کے فوری بعد پولیس نے اطراف کے علاقوں میں مغوی اہلکاروں کی بازیابی کے لیے سرچ آپریشن شروع کردیا، ترجمان محکمہ صحت خیبرپختونخوا کے مطابق 5 روزہ مہم کے دوران صوبے بھر میں پانچ سال سے کم عمر تقریباً 73 لاکھ بچوں کو پولیو ویکسین کی خوراک دی جائے گی۔
لائیو ٹی وی