کینسر سے جنگ لڑنے والی حنا خان رشتہ ازدواج میں بندھ گئیں
کینسر سے جنگ لڑنے والی بھارتی مسلمان اداکارہ حنا خان دیرینہ ہندو دوست سے رشتہ ازدواج میں بندھ گئیں۔
حنا خان نے 4 جون کو انسٹاگرام پر شادی کی تصاویر شیئر کرتے ہوئے بتایا کہ انہوں نے اپنے دیرینہ دوست راکی جیسوال سے شادی کرلی۔
انہوں نے شادی سے متعلق مزید کوئی معلومات فراہم نہیں کی، تاہم ان کی جانب سے شیئر کردہ تصاویر میں انہیں اور ان کے دلہے کو شادی کے دستاویزات پر دستخط کرتے دیکھا جا سکتا ہے۔
بھارتی قوانین کے مطابق انڈیا میں دو مختلف مذاہب سے تعلق رکھنے والے افراد کو اپنی مذہبی رسومات کے تحت شادی کرنے کے لیے علاوہ حکومت کے بنائے گئے قوانین کے مطابق بھی شادی کرنی پڑتی ہے۔
اداکارہ نے شادی سے متعلق مزید کوئی تفصیلات فراہم نہیں کیں کہ ان کی شادی کہاں ہوئی؟
’ٹائمز آف انڈیا‘ کے مطابق اداکارہ نے 4 جون کو شادی کی تصدیق کی، ان کی شادی میں قریبی دوستوں اور رشتے داروں نے شرکت کی۔
حنا خان کے ہندو دوست راکی جیسوال سے ایک دہائی سے زیادہ عرصے سے تعلقات ہیں، دونوں کو متعدد بار ایک ساتھ دیکھا جا چکا ہے۔
کینسر کے علاج کے دوران بھی راکی جیسوال اداکارہ کے ساتھ دکھائی دیے، دونوں پہلے ہی شادی کا ارادہ ظاہر کر چکے تھے۔
حنا خان میں گزشتہ برس تیسرے اسٹیج کے کینسر کی تشخیص ہوئی تھی اور وہ تاحال زیر علاج ہیں۔
حنا خان کا آپریشن بھی ہوا تھا جب کہ ان کی کیموتھراپیز بھی مکمل ہوچکی ہیں لیکن اس باوجود وہ کینسر کا علاج کروا رہی ہیں اور تاحال انہوں نے موذی مرض سے مکمل صحت یاب ہونے کی تصدیق نہیں کی۔
لائیو ٹی وی