جوہری تنصیبات پر حملے نئےنہیں، پیشرفت جاری رہے گی، ایران
ایران نے کہا ہے کہ جوہری تنصیبات پر حملے نئے نہیں ہے، ایٹمی پروگرام پر پیش رفت جاری رہے گی۔
قطری نشریاتی ادارے الجزیرہ کی رپورٹ کے مطابق جوہری تنصیبات پر امریکی حملوں کے بعد، ایران کی جوہری توانائی تنظیم کے ترجمان بہروز کمالوندی نے کہا ہے کہ سویلین جوہری شعبے کو ترقی دینے کی کوششیں جاری رہیں گی۔
بہروز کمالوندی نے ایران کی نیوز ایجنسی ینگ جرنلسٹ کلب کو بتایا،’ یہ پہلی بار نہیں ہے کہ ہماری تنصیبات پر حملہ کیا گیا ہے، ہماری صلاحیتوں کو دیکھتے ہوئے، جوہری صنعت کو جاری رہنا چاہیے۔’
ایران کی جوہری توانائی تنظیم کے ترجمان نے تصدیق کی کہ اس کی فردو، صفہان اور نطنز کی تنصیبات پر حملے ہوئے ہیں، تاہم تینوں مقامات پر تابکاری آلودگی کے کوئی آثار نہیں تھے۔
خیال رہے کہ گذشتہ امریکا نے، ایران اسرائیل جنگ میں شامل ہوتے ہوئے ایران کی جوہری تنصیبات پر بمباری کی تھی۔
حملے کے بعد امریکی صدر ڈونلڈ ٹرمپ نے ’ٹروتھ سوشل‘ پر اپنی پوسٹ میں اعلان کیا تھا کہ امریکا نے ایران میں فردو، نطنز اور اصفہان جوہری تنصیبات پر ’انتہائی کامیاب حملہ‘ مکمل کر لیا ہے۔
اپنی پوسٹ میں ڈونلڈ ٹرمپ کا کہنا تھا کہ تمام امریکی طیارے اب ایران کی فضائی حدود سے باہر نکل چکے ہیں۔
امریکی صدر نے لکھا کہ فردو نیوکلیئر سائٹ ہمارا مرکزی ہدف تھا اور اس پر مکمل بمباری کی گئی ہے اور یہ پلانٹ ختم کردیا ہے۔
دریں اثنا امریکی وزیردفاع پیٹ ہیگسیتھ نے آج میڈیا بریفنگ میں کہا کہ ہم نے ایران کا ایٹمی پروگرام تباہ کردیا ہے۔
انہوں نے کہا کہ کارروائی کا مقصد ایران میں رجیم چینج نہیں تھا، فردو تنصیبات بنیادی ہدف تھیں اور مطلوبہ نتائج حاصل کرلیے ہیں۔
امریکی وزیردفاع نےخبردار کیا کہ اگر ایران نے جواب دیا تو گزشتہ رات سے زیادہ سخت جواب دیاجائےگا۔
لائیو ٹی وی