شمالی وزیرستان اور بنوں گیریژن میں فورسز پر حملہ بھارت اور فتنہ الخوارج کے گٹھ جوڑ کا نتیجہ نکلا
شمالی وزیرستان اور بنوں گیریژن میں سیکیورٹی فورسز پر حملہ بھارت اور فتنہ الخوارج کے گٹھ جوڑ کا نتیجہ نکلا، بھارتی پراکسیز فتنہ الخوارج اور فتنہ الہندوستان کی دہشت گردی کے ناقابل تردید شواہد سامنے آگئے۔
ڈان نیوز کے مطابق پاکستان نے متعدد بار بھارتی ریاستی سرپرستی میں دہشت گردی کو شواہد کے ساتھ بے نقاب کیا، پاک فوج کے شعبہ تعلقات عامہ کے سربراہ ڈائریکٹر جنرل (ڈی جی آئی ایس پی آر) لیفٹیننٹ جنرل احمد شریف چوہدری نے متعدد بار بھارتی دہشت گردی کے ناقابل تردید شواہد پیش کیے ۔
29 اپریل کو پریس کانفرنس کرتے ہوئے ڈی جی آئی ایس پی آر نے واضح کیا تھا کہ بھارتی فوج کے افسران پاکستان میں دہشت گردی میں ملوث ہیں، 25 اپریل کو جہلم کے قریب سیکیورٹی فورسز نے ایک مشتبہ شخص کو گرفتار کیا تھا، جس کے قبضے سے دیسی ساختہ بم، ڈرون، متعدد موبائل فونز اور 10 لاکھ روپے نقد برآمد کیے گئے تھے۔
گرفتار شخص نے بھارت میں تربیت حاصل کرنے کا اعتراف کیا، فرانزک تجزیے سے اس ملزم کے بھارتی آرمی افسران سے رابطوں کے شواہد بھی ملے تھے۔
ڈی جی آئی ایس پی آر نے آگاہ کیا تھا کہ میجر سندیپ اور کئی بھارتی افسران کی ہدایت پر پنجاب اور بلوچستان کے مختلف علاقوں میں بم نصب کرنے کی منصوبہ بندی کی گئی تھی۔
اسی طرح سانحہ جعفر ایکسپریس میں بھی فتنہ الہندوستان کے مہرے اپنے بھارتی ہینڈلرز سے مسلسل رابطے میں رہے، را سے منسلک بھارتی سوشل میڈیا اکاؤنٹس ایک منظم انداز میں پاکستان میں دہشت گردی، فتنہ الخوراج اور فتنہ الہندوستان کے بیانیے کو پروموٹ کرتے ہیں۔
بھارت کے حاضر سروس افسر کلبھوشن یادیو کو بھی بلوچستان سے گرفتار کیا گیا تھا، کلبھوشن نے بلوچستان میں تخریبی سرگرمیوں اور دہشت گردی میں ملوث ہونے کا اعتراف کیا تھا۔
بلوچستان میں فتنہ الہندوستان کے ہتھیار ڈالنے والے دہشتگردوں کے بیانات سے بھی بھارتی دہشتگردی کے واضح ثبوت ملے۔
لائیو ٹی وی