غزہ جنگ بندی مذاکرات اسرائیلی افواج کے انخلا پر اختلافات کے باعث تعطل کا شکار
غزہ میں جنگ بندی کے معاہدے کے لیے جاری مذاکرات اسرائیلی افواج کے فلسطینی علاقے سے انخلا پر اختلافات کے باعث تعطل کا شکار ہو گئے، جیسا کہ دوحہ میں مذاکرات سے واقف فلسطینی اور اسرائیلی ذرائع نے ہفتہ کو رائٹرز کو بتایا۔
ڈان اخبار میں شائع غیر ملکی خبر رساں اداروں کی رپورٹ کے مطابق ذرائع نے بتایا کہ یہ بالواسطہ مذاکرات، جو امریکا کی تجویز کردہ 60 دن کی جنگ بندی سے متعلق ہیں، جاری رہنے کی توقع ہے۔
فرانسیسی خبر رساں ادارے ’اے ایف پی‘ کے مطابق مذاکرات کی معلومات سے واقف 2 فلسطینی ذرائع کا کہنا ہے کہ بات چیت اس وجہ سے رکی ہوئی ہے کہ اسرائیل اپنی فوج کو غزہ میں رکھنے کی تجویز دے رہا ہے۔
مذاکرات کے دوران بھی اسرائیل نے غزہ پر فضائی حملے جاری رکھے ہوئے ہیں، اور غزہ کی سول ڈیفنس ایجنسی نے ہفتے کے روز 20 سے زائد فلسطینیوں کی شہادت کی تصدیق کی ہے۔
بسام حمدان نے کہا کہ ہم سب یہاں اس لیے آئے تھے، کیوں کہ ہمیں بتایا گیا تھا کہ یہ علاقہ محفوظ ہے،جب ہم سو رہے تھے، تو ایک دھماکا ہوا، جہاں دو لڑکے، ایک لڑکی اور ان کی ماں موجود تھے، دھماکے کے بعد ہم نے انہیں چیتھڑوں میں پایا، ان کے جسم کے ٹکڑے بکھرے ہوئے تھے۔
طبی عملے نے کہا کہ ہفتے کو 17 افراد اس وقت شہید ہوئے، جب وہ خوراک کی امداد حاصل کرنے کی کوشش کر رہے تھے اور اسرائیلی فوج نے فائرنگ کی، اقوام متحدہ کا کہنا ہے کہ 6 ہفتوں میں امداد کے متلاشی 800 فلسطینی شہید ہو چکے ہیں۔
عینی شاہدین نے برطانوی خبر رساں ادارے ’رائٹرز‘ کو بتایا کہ لوگوں کو سر اور سینے میں گولیاں لگیں، رائٹرز نے کئی لاشیں سفید کفن میں لپٹی ہوئی دیکھیں، لواحقین نصیر ہسپتال میں رو رہے تھے۔
اسرائیلی فوج کا کہنا ہے کہ اس نے وارننگ شاٹس فائر کیے، لیکن اس کے جائزے میں کسی کو فوج کی فائرنگ سے زخمی ہونے کے شواہد نہیں ملے۔
ہفتے کے روز اقوام متحدہ کی 7 ایجنسیوں نے ایک مشترکہ بیان میں خبردار کیا کہ اگر غزہ میں ایندھن ختم ہو گیا تو یہ ایک ناقابل برداشت نیا بوجھ ہو گا اس آبادی پر جو پہلے ہی بھوک کے دہانے پر ہے۔
اسرائیل اور حماس کے وفود قطر میں ایک ہفتے سے موجود ہیں، جہاں یرغمالیوں کی مرحلہ وار رہائی، اسرائیلی افواج کا انخلا اور جنگ کے خاتمے پر بات چیت کے لیے ایک نیا دباؤ ڈالا جا رہا ہے۔
امریکی صدر ڈونلڈ ٹرمپ، جنہوں نے گزشتہ ہفتے اسرائیلی وزیر اعظم نیتن یاہو سے ملاقات کی، انہوں نے کہا تھا کہ جلد معاہدے کی امید ہے، تاہم، اسرائیلی اور فلسطینی ذرائع کا کہنا ہے کہ کچھ دیرینہ مسائل بدستور حل طلب ہیں۔
ایک فلسطینی ذریعے نے کہا کہ حماس نے وہ انخلا کے نقشے مسترد کر دیے ہیں جو اسرائیل نے تجویز کیے تھے، جن کے مطابق رفح، شمالی و مشرقی علاقوں سمیت غزہ کا تقریباً 40 فیصد حصہ اسرائیلی کنٹرول میں رہنا تھا۔
2 اسرائیلی ذرائع نے کہا کہ حماس چاہتی ہے کہ اسرائیل وہاں تک پیچھے ہٹ جائے جہاں اس نے مارچ سے قبل پچھلی جنگ بندی کے وقت کنٹرول سنبھالا تھا۔
فلسطینی ذرائع نے کہا کہ امداد کی فراہمی اور جنگ کے خاتمے کی ضمانتوں سے متعلق معاملات بھی رکاوٹ ہیں، یہ بحران مزید امریکی مداخلت سے حل کیا جا سکتا ہے۔
حماس کا طویل عرصے سے مطالبہ ہے کہ جب تک جنگ کے خاتمے پر کوئی معاہدہ نہ ہو جائے، وہ باقی ماندہ یرغمالیوں کو آزاد نہیں کرے گی, جب کہ اسرائیل کا اصرار ہے کہ وہ تب تک جنگ ختم نہیں کرے گا, جب تک کہ تمام قیدی رہا نہ ہو جائیں اور حماس کو جنگی قوت اور غزہ میں انتظامیہ کے طور پر ختم نہ کر دیا جائے۔
لائیو ٹی وی