غزہ: حماس کی کارروائی میں ’محفوظ ترین‘ مارک فور ٹینک تباہ، 3 اسرائیلی فوجی ہلاک
شمالی غزہ کی پٹی میں حماس کے مجاہدین کی کارروائی میں دنیا کا سب سے محفوظ سمجھا جانے والا مارک فور نامی اسرائیلی ٹینک تباہ ہوگیا، دھماکے کے نتیجے میں 3 اسرائیلی فوجی ہلاک اور ایک افسر زخمی ہوگیا۔
ٹائمز آف اسرائیل کی رپورٹ کے مطابق شمالی غزہ کی پٹی میں پیر کے روز اسرائیلی ٹینک دھماکے کی زد میں آگیا، تحقیقاتی ٹیم اس مہلک دھماکے کی وجوہات جاننے کی کوشش کر رہی ہے، خیال کیا جا رہا ہے کہ یہ ایک آپریشنل غلطی کا نتیجہ ہو سکتا ہے۔
ہلاک ہونے والے تین فوجیوں میں یارڈینا کا رہائشی 21 سالہ اسٹاف سارجنٹ شوہم مناہم، ایفرات کا رہائشی 20 سالہ سارجنٹ شلومو یاکیر شریم، ریشون لیسیون سے 19 سالہ سارجنٹ یولی فاکٹر شامل ہیں، جب کہ زخمی افسر کا نام ظاہر نہیں کیا گیا، تاہم فوج کے مطابق اس کی حالت نازک ہے، یہ تمام اہلکار 401ویں آرمرڈ بریگیڈ کی 52ویں بٹالین سے تعلق رکھتے ہیں۔
اسرائیلی افواج (آئی ڈی ایف) کی ابتدائی تحقیق کے مطابق، ہلاک ہونے والے فوجی ٹینک میں سوار تھے جو پیر کے دن دوپہر کے وقت شمالی غزہ کے شہر جبالیا میں دھماکے کی زد میں آیا۔
ابتدا میں شبہ ظاہر کیا گیا کہ ٹینک کو حماس کے راکٹ پروپیلڈ گرینیڈ سے نشانہ بنایا گیا، لیکن بعد ازاں فوج کو یقین ہوا کہ دھماکا ممکنہ طور پر ٹینک کے اندر گولا پھٹنے کے باعث ہوا، دیگر ممکنہ وجوہات کی بھی تحقیقات کی جا رہی ہیں۔
ان فوجیوں کی ہلاکت کے بعد غزہ میں حماس کے خلاف زمینی آپریشن اور سرحد پر جاری کارروائیوں میں اسرائیل کے ہلاک ہونے والے فوجیوں کی تعداد بڑھ کر 454 ہو گئی ہے، جس میں 2 پولیس اہلکار اور وزارت دفاع کے 3 شہری کنٹریکٹرز بھی شامل ہیں۔
کسی قصبے میں سائرن نہیں بجے، البتہ غزہ بارڈر کے قریب کھلے علاقوں میں الرٹ جاری ہوا، لیکن کوئی جانی نقصان نہیں ہوا۔
دوسری طرف، غزہ میں ایک ویڈیو سوشل میڈیا پر وائرل ہوئی جس میں درجنوں فلسطینی زمین پر لیٹے ہوئے ہیں اور اطراف میں شدید گولیاں چلنے کی آوازیں سنی جا سکتی ہیں۔
ویڈیو کے مقام کی بنیاد پر خیال ہے کہ یہ واقعہ رفح کے علاقے میں غزہ ہیومنیٹیرین فاؤنڈیشن (جی ایچ ایف) کے امدادی مرکز کے قریب پیش آیا۔
آئی ڈی ایف کا کہنا ہے کہ ویڈیو کی تفصیلات کا جائزہ لیا جا رہا ہے۔ اس مرحلے پر آج رفح میں امدادی مرکز پر آئی ڈی ایف کی فائرنگ سے کسی جانی نقصان کی اطلاع نہیں۔
یاد رہے کہ اسرائیل اپنے مارک 4 ٹینک کو دنیا کا محفوظ ترین ٹینک قرار دیتا ہے ۔
اس سے پہلے اسرائیل-ایران 12 روز جنگ کے دوران ایران بھی اسرائیل کے فضائی دفاعی نظام آئرن ڈوم کا حصار توڑ چکا ہے، جس کے بارے میں اسرائیل دعویٰ کرتا تھا کہ اس حصار کوکوئی نہیں توڑ سکتا، لیکن جنگ کے دوران کئی ایرانی میزائلوں نے اسرائیلی دفاعی نظام کو ناکارہ ثابت کیا تھا۔
لائیو ٹی وی