چیف جسٹس پشاور ہائیکورٹ جسٹس ایس ایم عتیق نے گورنر خیبرپختونخوا (کے پی) فیصل کریم کنڈی کو مخصوص نشستوں پر نامزد ارکان سے حلف لینے کے لیے نامزد کر دیا۔

ڈان نیوز کے مطابق پشاور سے اہم پیش رفت سامنے آئی ہے، جہاں کل ہونے والے سینیٹ کے انتخابات پر غیر یقینی کے بادل چھٹنے لگے ہیں، اپوزیشن جماعتوں کی درخواست پر پشاور ہائی کورٹ کے چیف جسٹس نے خیبرپختونخوا اسمبلی کی مخصوص نشستوں پر نامزد کیے گئے ارکان سے حلف لینے کے لیے گورنر کے پی فیصل کریم کنڈی کو نامزد کر دیا ہے۔

چیف جسٹس نے آرٹیکل 255 شق 2 کے تحت گورنر کو حکم دیا، اعلامیے کے مطابق گورنر سیکریٹری خیبر پختونخوا اسمبلی کے ساتھ رابطہ کرکے ارکان سے حلف لے۔

مخصوص نشستوں کے اراکین کا رجسٹر پر حاضری کو بھی یقینی بنایا جائے، اپوزیشن نے رجسٹرار ہائیکورٹ کے پاس حلف برادری کے لیے درخواست دی تھی، حلف برداری سے متعلق الیکشن کمیشن کا خط بھی ہائیکورٹ کے پاس پہلے سے موجود تھا۔

الیکشن کمیشن کا چیف جسٹس پشاور ہائیکورٹ کو خط

الیکشن کمیشن نے چیف جسٹس پشاور ہائیکورٹ کو مخصوص نشستوں پر نامزد ممبران سے حلف لینے کے لیے کسی کو نامزد کرنے کے لیے خط لکھا تھا۔

سیکریٹری الیکشن کمیشن نے خط میں آئین کے آرٹیکل 255 (2) کا بھی حوالہ دیا تھا، خط میں کہا گیا تھا کہ آئین کے تحت سینیٹ الیکشن کا پراسیس مکمل کرنے کے لیے ایک بار پھر آپ کو خط لکھا ہے،

خط میں کہا گیا کہ الیکشن کمیشن نے مخصوص نشستوں پر حلف برداری کے لیے انتظامات کرنے کی ہدایت کررکھی ہے۔

سیکریٹری الیکشن کمیشن نے سیکریٹری کے پی کے اسمبلی کو لکھے گئے خط کا بھی حوالہ دیا، خط میں صوبائی اسمبلی سے اپوزیشن لیڈر اور مخصوص نشستوں پر حلف کی منتظر خواتین کے خطوط کا حوالہ بھی دیا گیا۔

اس سے قبل خیبرپختونخوا اسمبلی میں کورم پورا نہ ہونے کی وجہ سے اسمبلی کا اجلاس 24 جولائی تک ملتوی کر دیا گیا تھا، مخصوص نشستوں پر نامزد ارکان کی حلف برداری بھی نہیں ہوسکی تھی۔

خیبر پختونخوا اسمبلی کا اجلاس 9 بجے طلب کیا گیا تھا، جو 2 گھنٹے سے زائد کی تاخیر سے شروع ہوا، مخصوص نشستوں پراراکین کی حلف برداری ایجنڈے کا حصہ تھی، اجلاس شروع ہوتے ہی رکن اسمبلی شیر علی آفریدی کی جانب سے کورم کی نشاندہی کر دی گئی، اسپیکر نے گھنٹیاں بجائیں لیکن ارکان ایوان میں نہیں آئے، جس کے بعد انہوں نے اجلاس 24 جولائی تک ملتوی کر دیا تھا۔

خیبرپختونخوا اسمبلی میں 25 مخصوص نشستوں کے اراکین نے آج حلف اٹھانا تھا، جن میں 21 خواتین اور 4 اقلیتی ارکان شامل ہیں، جمعیت علمائے اسلام (جے یو آئی ف) اور مسلم لیگ (ن) کے 7، 7، پیپلز پارٹی کے 4، اے این پی کے 2 اور پی ٹی آئی پی کے ایک رکن کو حلف اٹھانا تھا۔

اسپیکر نے رولنگ دی کہ اسمبلی میں ارکان کی تعداد پوری نہیں ہے، اپوزیشن کے ارکان نے اسپیکر کی ڈائس کی سامنے اجلاس ملتوی کرنے پر احتجاج کیا تھا۔

خیبرپختونخوا اسمبلی میں مخصوص نشستوں کے لیے نامزد امیدوار اسمبلی میں موجود رہے۔

پاکستان تحریک انصاف (پی ٹی آئی) نے خیبرپختونخوا اسمبلی اجلاس میں شرکت نہ کرنے کا فیصلہ کیا تھا، یہ فیصلہ پی ٹی آئی کی پارلیمانی پارٹی اجلاس میں کیا گیا تھا۔

پی ٹی آئی کی پارلیمانی پارٹی کے اجلاس میں کہا گیا کہ ہم ان مخصوص نشستوں کو مان ہی نہیں رہے، اپوزیشن کو مخصوص نشستیں دینا ہمارے حق پر ڈاکہ ہے، فیصلہ کیا گیا کہ صوبائی اسمبلی کا اجلاس شروع ہوتے ہی کورم کی نشاندہی کی جائے گی۔

خیبرپختونخوا اسمبلی میں اپوزیشن لیڈر ڈاکٹر عباد نے خصوص نشستوں پر ارکان کی حلف برداری نہ ہونے پر عدالت عالیہ سے رجوع کرنے کا اعلان کیا تھا۔

صوبائی اسمبلی کے باہر میڈیا سے گفتگو میں انہوں نے کہا کہ چیف جسٹس کو درخواست دیں گے کہ وہ خود ارکان سے حلف لیں یا کسی کو نامزد کردیں۔

انہوں نے واضح کیا تھا کہ حکومت اور اپوزیشن کے درمیان 6 /5 کا فارمولا برقرار ہے۔

اپوزیشن کا حلف برداری کیلئے ہائیکورٹ سے رجوع

اپوزیشن نے مخصوص نشستوں پر حلف برداری کے لیے پشاور ہائیکورٹ میں درخواست دائر کی تھی۔

مخصوص نشستوں پر حلف برداری کے لیے درخواست رجسٹرار پشاور ہائیکورٹ کے پاس جمع کرائی گئی تھی۔

ایڈیشنل سیکریٹری جنرل پیپلز پارٹی ابرار سعید نے بتایا تھا کہ درخواست پیپلز پارٹی اور دیگر جماعتوں کی جانب سے دائر کی گئی ہے، درخواست میں موقف اختیار کیا گیا کہ مخصوص نشستوں پر کے پی اسمبلی میں منتخب اراکین سے حلف نہیں لیا گیا۔

درخواست میں استدعا کی گئی تھی کہ چیف جسٹس حلف برداری کے لیے کسی کو نامزد کریں۔