کابل: محسن نقوی کی افغان ہم منصب سے ملاقات، انسداد دہشتگردی سمیت اہم امورپر گفتگو
وفاقی وزیر داخلہ محسن نقوی نے کابل میں افغان ہم منصب سراج الدین حقانی سے اہم ملاقات کی، ملاقات میں انسداد دہشت گردی، دراندازی و کالعدم تحریک طالبان سمیت مختلف امور پر تبادلہ خیال کیا گیا۔
افغانستان کے دارالحکومت کابل میں وفاقی وزیر داخلہ محسن نقوی کی افغان ہم منصب سراج الدین حقانی سے اہم ملاقات ہوئی جس میں دوطرفہ تعلقات خصوصاً انسداد دہشت گردی، دراندازی و کالعدم تحریک طالبان کے حوالے سے تبادلہ خیال کیا گیا۔
ملاقات میں پاک افغان سرحد کی موثر مینجمنٹ، منشیات کی روک تھام اور سرحد پار نقل و حرکت کو منظم کرنے کے طریقہ کار پر بھی بات چیت کی گئی۔
دونوں وزرا نے پاکستان میں غیر قانونی طور پر مقیم افغان شہریوں کے وطن واپسی کے عمل پر گفتگو کی اور پاکستان اور افغانستان کے درمیان پرامن بقائے باہمی، استحکام اور تعاون کی ضرورت پر زور دیا۔
ملاقات میں پاک افغان بارڈر مینجمنٹ اور دہشت گردی کے فتنہ کے خاتمہ کیلئے باہمی تعاون کو مضبوط بنانے پر اتفاق کیا گیا۔
دوران ملاقات وزیرداخلہ محسن نقوی نے کہا کہ دہشت گرد تنظیمیں فساد اور عدم استحکام کا باعث بن رہی ہیں، انہیں مل کر روکنا ہو گا۔
انہوں نے مزید کہا کہ پاکستان افغانستان کے ساتھ برادرانہ اور دیرپا تعلقات کا خواہاں ہے۔
محسن نقوی نے کہا کہ پاکستان نے کئی دہائیوں تک لاکھوں افغان مہاجرین کی بے لوث مہمانوازی کی، افغان شہریوں کی قانونی طور پر آمد کے دروازے کھلے ہیں۔
قبل ازیں وفاقی وزیر داخلہ سید محسن نقوی ایک روزہ دورے پر کابل پہنچے تو نائب افغان وزیر داخلہ مولوی محمد نبی عمری نے ان پرتپاک استقبال کیا۔
افغان وزارت داخلہ آمد پر افغان وزیر داخلہ سراج الدین حقانی نے وفاقی وزیرداخلہ کا خیر مقدم کیا۔
وفاقی وزیرداخلہ محسن نقوی کے ہمراہ نمائندہ خصوصی محمد صادق اور اور سیکریٹری داخلہ بھی ہیں۔
لائیو ٹی وی