کیا پرانی دوستی اب بھی برقرار ہے؟ عاشر وجاہت نے ہانیہ عامر سے تعلق پر خاموشی توڑ دی
ابھرتے ہوئے گلوکار و اداکار عاشر وجاہت نے انکشاف کیا کہ ہانیہ عامر سے ان کی دوستی اب بھی برقرار ہے، تاہم کچھ ذاتی وجوہات کی بنا پر وہ اب سوشل میڈیا پر ساتھ نظر نہیں آتے۔
عاشر وجاہت نے حال ہی میں احمد علی بٹ کے پوڈکاسٹ میں شرکت کی، جہاں انہوں نے مختلف موضوعات پر کھل کر گفتگو کی۔
ایک سوال کے جواب میں انہوں نے کہا کہ وہ سوشل میڈیا پر ہونے والی تنقید کو مثبت انداز میں لیتے ہیں اور اگر وہ درست بنیاد پر ہو تو وہ اپنی غلطیوں کو سدھارنے کی کوشش کرتے ہیں۔
اداکار نے بتایا کہ ہانیہ عامر کے ساتھ ان کی دوستی اب بھی قائم ہے، لیکن اب وہ خود ہی ان سے کچھ فاصلے پر رہتے ہیں۔
ان کا کہنا تھا کہ ایک معروف اداکار نے انہیں مشورہ دیا تھا کہ اگر وہ صرف مشہور لوگوں کے ساتھ ہی نظر آئیں گے تو ان کی اپنی کوئی الگ پہچان نہیں بنے گی، لوگ انہیں صرف ان کے دوستوں کے حوالے سے جانیں گے، اس لیے انہیں چاہیے کہ اپنی صلاحیتوں پر توجہ دیں اور ایسا کام کریں جس سے لوگ انہیں ان کی محنت اور فن کی وجہ سے پہچانیں۔
عاشر وجاہت نے بتایا کہ وہ اب بھی ہانیہ عامر کے دوست ہیں، تاہم اب وہ اپنی ملاقاتوں کی ویڈیوز اور تصاویر سوشل میڈیا پر شیئر نہیں کرتے۔
ان کا یہ بھی کہنا تھا کہ وقت کے ساتھ انہیں یہ شعور حاصل ہوا ہے کہ زندگی کے ہر لمحے کو دوسروں کے ساتھ بانٹنا ضروری نہیں ہوتا، کچھ لمحات صرف ہمارے اپنے لیے ہوتے ہیں۔
ہانیہ عامر اور عاشر وجاہت کو بہترین دوست سمجھا جاتا ہے اور ماضی میں دونوں کی ایک ساتھ کئی تصاویر اور ویڈیوز بھی سوشل میڈیا پر وائرل ہو چکی ہیں۔
کئی مواقع پر عاشر وجاہت اور ہانیہ عامر کو دوستی کی وجہ سے سوشل میڈیا صارفین کی تنقید کا سامنا بھی کرنا پڑا۔
لائیو ٹی وی