لاہور کی انسدادِ دہشت گردی عدالت میں 9 مئی تھانہ شادمان نذر آتش سے متعلق مقدمے میں 8 سرکاری گواہان پرجرح مکمل کر لی گئی۔

انسداد دہشتگردی عدالت کےایڈمن جج منظرعلی گل نے 9 مئی تھانہ شادمان نذر آتش سمیت 2 مقدمات کا جیل ٹرائل کیا۔

اس موقع پر شاہ محمود قریشی اور ڈاکٹریاسمین راشد سمیت دیگر ملزمان کی حاضری مکمل کی گئی۔

ملزمان کی جانب سے میاں تبسم، رانا مدثر عمر اور میاں علی عمار ایڈووکیٹ پیش ہوئے۔

تھانہ شادمان نذر آتش کیس میں 8 سرکاری گواہان پر جرح مکمل کر لی گئی، جبکہ 2 تفتیشی افسران انسپکٹر شوکت اور محمد عالم نے بیانات ریکارڈ کروائے۔

عدالت نے تفتیشی افسران کو کل جرح کے لیے دوبارہ طلب کر لیا۔

ملزمان کے وکیل برہان معظم ملک ایڈووکیٹ کل تفتیشی افسران پرجرح کریں گے

ادھر، جناح ہاؤس کےقریب پولیس کی گاڑیاں جلانے کے مقدمے میں بھی 8 گواہان پرجرح کی گئی۔

پس منظر

یاد رہے کہ 9 مئی 2023 کو القادر ٹرسٹ کیس میں عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا۔

اس دوران لاہور کے علاقے ماڈل ٹاؤن میں 9 مئی کو مسلم لیگ (ن) کے دفتر کو جلانے کے علاوہ فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد ہلاک اور 290 زخمی ہوئے تھے۔

مظاہرین نے لاہور میں کور کمانڈر کی رہائش گاہ پر بھی دھاوا بول دیا تھا جسے جناح ہاؤس بھی کہا جاتا ہے اور راولپنڈی میں واقع جنرل ہیڈکوارٹرز (جی ایچ کیو) کا ایک گیٹ بھی توڑ دیا تھا۔

اس کے بعد ملک بھر میں قانون نافذ کرنے والے اداروں کے ساتھ لڑائی، توڑ پھوڑ اور جلاؤ گھیراؤ میں ملوث 1900 افراد کو گرفتار کر لیا گیا تھا جب کہ عمران خان اور ان کی پارٹی رہنماؤں اور کارکنان کے خلاف مقدمات بھی درج کیے گئے تھے۔