اسرائیلی کابینہ کی جانب سے غزہ پر قبضے کے منصوبے کی منظوری ’ خطرناک اشتعال انگیزی’ ہے، وزیراعظم
وزیراعظم شہباز شریف نےاسرائیلی کابینہ کی جانب سے غزہ شہر پر قبضے کے منصوبے کی منظوری کی شدید مذمت کرتے ہوئے اسے’ خطرناک اشتعال انگیزی’ قرار دیا۔
خیال رہے کہ آج ہی اسرائیل کی سیاسی و سیکیورٹی کابینہ نے غزہ شہر پر کنٹرول حاصل کرنے کے منصوبے کی منظوری دی تھی، یہ منظوری ایسے وقت میں دی گئی جب اس سے چند گھنٹے پہلے وزیرِاعظم بنیامین نیتن یاہو نے کہا تھا کہ اسرائیل پوری غزہ پٹی پر فوجی کنٹرول حاصل کرنے کا ارادہ رکھتا ہے۔
وزیرِاعظم شہباز شریف نے ’ ایکس پر’ ایک بیان میں کہا کہ ’ ہم اسرائیلی کابینہ کی جانب سے غزہ شہر پر غیر قانونی اور ناجائز قبضے کے منصوبے کی منظوری کی سخت الفاظ میں مذمت کرتے ہیں، یہ پہلے سے ہی تباہ کن جنگ میں خطرناک اضافہ ہے جو فلسطینی عوام کے خلاف جاری ہے۔’
انہوں نے مزید کہا کہ فوجی کارروائیوں کے پھیلاؤ سے موجودہ انسانی بحران مزید سنگین ہو جائے گا اور خطے میں امن کے کسی بھی امکان کو نقصان پہنچے گا۔
وزیرِاعظم نے کہا کہ’ ہمیں اس المیے کی اصل وجہ کو نظر انداز نہیں کرنا چاہیے، اور وہ ہے فلسطینی سرزمین پر اسرائیل کا طویل عرصے سے جاری غیر قانونی قبضہ، جب تک یہ قبضہ جاری رہے گا، امن ایک خواب ہی رہے گا۔’
انہوں نے اعادہ کیا کہ پاکستان فلسطینی عوام کے جائز حقوق کی غیر متزلزل حمایت کرتا رہے گا، جن میں حق خود ارادیت اور ایک آزاد و خودمختار فلسطینی ریاست کا قیام شامل ہے، جس کا دارالحکومت القدس الشریف ہو، اور یہ سب متعلقہ اقوام متحدہ اور او آئی سی قراردادوں کے مطابق ہو۔
وزیرِاعظم شہباز شریف نے عالمی برادری سے فوری مداخلت کی اپیل کی تاکہ اسرائیل کی بلاجواز جارحیت کو فوراً روکا جا سکے، بے گناہ شہریوں کے تحفظ کو یقینی بنایا جا سکے، اور غزہ کے عوام تک نہایت ضروری انسانی امداد پہنچائی جا سکے۔
لائیو ٹی وی