ملک کے 75 سے زائد اضلاع کے ماحولیاتی نمونوں میں پولیو وائرس موجود ہونے کا انکشاف
پاکستان کے بڑے شہروں سمیت 75 سے زائد اضلاع کے ماحولیاتی نمونوں میں پولیو وائرس کی موجودگی پائی گئی ہے۔
کراچی، لاہور، اسلام آباد سمیت بڑے شہروں کے نمونوں میں پولیو وائرس پایا گیا، جس کے بعد وزیراعظم نے پولیو ٹاسک فورس کا اجلاس 27 اگست کو طلب کرلیا ہے، اجلاس میں چاروں صوبوں کے وزرائے اعلیٰ، چیف سیکریٹریز بھی شریک ہوں گے۔
پاکستان میں رواں سال پولیو سے متاثرہ بچوں کی تعداد 21 تک پہنچ گئی ہے، جنوبی خیبر پختونخوا سے اب تک 13 کیسز رپورٹ ہوچکے ہیں۔
وزیر اعظم کی زیر صدارت اجلاس میں انسداد پولیو اقدامات اور کارکردگی کا جائزہ لیا جائے گا۔
وفاقی وزیر صحت سید مصطفیٰ کمال کا کہنا ہے کہ پولیو وائرس ملک کے اکثر حصوں میں موجود ہے، آئندہ چند روز میں ملک بھر میں ایک اور پولیو مہم شروع کی جائے گی۔
انہوں نے کہا کہ پولیو مہم میں جنوبی خیبر پختونخوا پر خصوصی توجہ ہوگی، جنوبی کے پی میں 3 سال سے ٹیمیں نہیں جا سکی ہیں، پولیو کا واحد علاج ویکسی نیشن ہے، بچوں نے قطرے نہ پیئے تو سالانہ ہزاروں کیسز رپورٹ ہو سکتے ہیں۔
وفاقی وزیر صحت نے مزید کہا کہ بیماریوں کے خاتمے کے لیے صاف پانی اور بہتر سیوریج نظام ضروری ہے، پولیو کے قطرے نہ پینے والے بچوں کے لیے ہر شہر اور گاؤں خطرہ ہے۔
لائیو ٹی وی