ملک کے 99 اضلاع میں انسداد پولیو مہم شروع، 2.8 کروڑ بچوں کو قطرے پلائے جائیں گے
ملک کے 99 مخصوص اضلاع میں مرحلہ وار انسدادِ پولیو مہم شروع کر دی گئی ہے، مہم کے دوران 2 کروڑ 80 لاکھ سے زائد بچوں کو پولیو سے بچاؤ کے قطرے پلائے جائیں گے، 2 لاکھ 40 ہزار سے زائد پولیو ورکرز اہم ذمہ داریاں سرانجام دے رہے ہیں۔
نیشنل ایمرجنسی آپریشنز سینٹر کے مطابق انسداد پولیو مہم کے دوران پنجاب کے 7 اضلاع میں 41 لاکھ سے زائد بچوں کو ویکسین دی جائے گی، تاہم سیلاب کی صورتحال کے پیش نظر 9 اضلاع میں پولیو مہم مؤخر کر دی گئی ہے۔
سندھ کے 25 اضلاع میں 89 لاکھ سے زائد، بلوچستان کے 26 اضلاع میں 21 لاکھ سے زائد اور خیبرپختونخوا کے 27 اضلاع میں 57 لاکھ سے زائد بچوں کو پولیو سے بچاؤ کے قطرے پلائے جائیں گے۔
جنوبی خیبرپختونخوا میں یہ مہم 15 ستمبر سے شروع ہوگی، اس کے علاوہ آزاد جموں و کشمیر اور گلگت بلتستان کے 2،2 اضلاع میں بھی بچوں کو پولیو ویکسین دی جائے گی جبکہ اسلام آباد میں 4 لاکھ 50 ہزار سے زائد بچوں کو پولیو کے قطرے پلائے جائیں گے۔
نیشنل ایمرجنسی آپریشنز سینٹر نے والدین سے اپیل کی ہے کہ وہ پولیو ٹیموں کے ساتھ تعاون کریں اور اپنے 5 سال سے کم عمر بچوں کو ہر صورت پولیو ویکسین کے 2 قطرے ضرور پلوائیں، کیونکہ یہ قطرے بچوں کو عمر بھر کی معذوری سے محفوظ بناتے ہیں۔
لائیو ٹی وی