بولی وڈ کے دبنگ ہیرو سلمان خان جو ان دنوں اپنی آنے والی ایکشن تھرلر فلم ’ریس تھری‘ کی شوٹنگ میں مصروف ہیں، ان سے متعلق اطلاعات ہیں کہ ان کی ایک اور آنے والی فلم تاخیر کا شکار ہوگی۔
سلمان خان کی ایکشن تھرلر فلم ’ریس تھری‘ جسے آئندہ ماہ 15 جون کو ریلیز کیے جانے کا اعلان کیا جاچکا ہے، اس کی تاحال شوٹنگ مکمل نہیں ہوسکی۔
اطلاعات ہیں کہ اس فلم کے آخری مناظر بھارتی ریاست راجستھان کے ضلع جودھپور میں فلمائے جائیں گے، جس کے لیے ٹیم وہاں موجود ہے۔
یہ وہی ضلع ہے، جہاں سلمان خان 1998 میں ریلیز ہونے والی فلم ’ہم ساتھ ساتھ‘ کی شوٹنگ کے دوران نایاب کالے ہرن کا شکار کرتے ہوئے ایک مقدمے میں پھنسے تھے، جس پر انہیں گزشتہ ماہ 5 اپریل کو عدالت نے 5 سال قید اور 10 ہزار جرمانے کی سزا بھی سنائی تھی۔
یہ بھی پڑھیں: دبنگ تھری کی تیاری شروع
تاہم بعد ازاں ڈسٹرکٹ اینڈ سیشن کورٹ جودھپور نے اداکار کی ضمانت منظور کرتے ہوئے انہیں جیل سے رہا کرنے کا حکم دیا تھا، تاہم پھر بھی سلو بھائی نے 2 دن جودھپور سینٹرل جیل میں گزارنے پڑے۔
اب ایک بار پھر سلمان خان اپنی نئی فلم کی شوٹنگ اسی ضلع جودھپور میں کرنے کے لیے پہنچے ہیں، لیکن ان کے حوالے سے تازہ خبر یہ ہے کہ ان کی فلم ’دبنگ تھری‘ ایک بار پھر تاخیر کا شکار ہوگئی ہے اور وہ آئندہ برس 25 جنوری کو ریلیز نہیں ہوسکے گی۔
بولی وڈ ہنگامہ نے فلم کی ٹیم کے قریبی ذرائع سے دعویٰ کرتے ہوئے اپنی رپورٹ میں بتایا کہ سلمان خان ’ریس تھری‘ اور اپنے ٹی وی شو ’دس کا دم‘ کی شوٹنگ میں مصروف ہیں۔
ساتھ ہی سلمان خان رواں برس ستمبر تک مختلف منصوبوں میں مصروف رہیں گے، جس وجہ سے ’دبنگ تھری‘ کی شوٹنگ 14 ستمبر سے پہلے شروع نہیں ہوسکے گی۔
یوں اگر فلم کی شوٹنگ ہی ستمبر میں شروع ہوگی تو اسے جنوری تک مکمل کرنا ممکن نہیں، اس لیے امکان ہے کہ ’دبنگ تھری‘ کو 25 جنوری کو ریلیز نہیں کیا جائے گا۔
مزید پڑھیں: دبنگ تھری: چلبل پانڈے کی ’رجو‘ سوناکشی یا مونی راؤ؟
اگرچہ سلمان خان نے تاحال ’دبنگ تھری‘ کی ریلیز اور کاسٹ کا اعلان نہیں کیا، تاہم خیال کیا جا رہا تھا کہ اسے 25 جنوری 2019 کو ریلیز کیا جائے گا۔
تاہم اب امکان ہے کہ اس کی نمائش مارچ 2019 تک ملتوی کی جائے گی۔
اطلاعات ہیں کہ ’دبنگ تھری‘ میں بھی سلمان خان کی ’رجو‘ کا کردار سوناکشی سنہا ہی نبھاتی نظر آئیں گی، جو پہلی دونوں فلموں میں بھی یہی کردار ادا کر چکی ہیں۔
سیریز کی تیسری فلم کی ہدایات پربھو دیوا دیں گے، جنہوں نے سلمان خان کی ’وانٹڈ‘ جیسی فلم کی ہدایات دیں، جب کہ فلم کی موسیقی ساجد، واجد ترتیب دیں گے، جن کے مطابق وہ منفرد آئٹم سانگ بنانے میں مصروف ہیں۔
’دبنگ تھری‘ کو بھی سلمان خان کے بھائی ارباز خان ہی پروڈیوس کریں گے۔
واضح رہے کہ اس سیریز کی پہلی فلم ’دبنگ‘ 2010 اور دوسری فلم ’دبنگ ٹو‘ 2012 میں ریلیز ہوئی تھی، دونوں میں سلمان خان اور سوناکشی سنہا نے مرکزی کردار ادا کیے تھے۔
پہلی دونوں فلموں میں سلمان خان بہادر پولیس افسر ’چلبل پانڈے‘ جب کہ سوناکشی سنہا ان کی بیوی ’رجو‘ کا کردار ادا کیا تھا۔ تیسری فلم میں بھی دونوں اداکار یہی کردار ادا کرتے نظر آئیں گے۔
سوناکشی سنہا نے اپنے فلمی کیریئر کا آغاز بھی ’دبنگ‘ سے ہی کیا تھا۔
تبصرے (0) بند ہیں