قومی ٹیم کے نئے فیلڈنگ کوچ گرانٹ بریڈ برن نے کہا ہے کہ ان کا ہدف پاکستان کی فیلڈنگ بہتر بناتے ہوئے اسے دنیا کی بہترین فیلڈنگ ٹیم بنانا ہے۔

دبئی میں میڈیا کے نمائندوں سے گفتگو کرتے ہوئے انہوں نے کہا کہ ٹیم کے ساتھ پہلا سیشن بہت شاندار رہا ٹیم کی موجودہ فٹنس اور فیلڈنگ دونوں بہت شاندار ہیں۔

قومی ٹیم کے نئے فیلڈنگ کوچ نے بدھ کو پہلی مرتبہ قومی ٹیم کو جوائن کیا اور ایشیا کپ ان کا بحیثیت فیلڈنگ کوچ پہلا امتحان ہو گا۔

انہوں نے کہا کہ پاکستانی کھلاڑی سیکھنے کے لیے تیار ہیں اور فیلڈنگ کی بنیادی تکنیک سے آگاہ ہیں۔

بریڈ برن نے کہا کہ میرا ہدف پاکستان کی فیلڈنگ کو بہتر بناتے ہوئے اسے دنیا کی بہترین فیلڈنگ سائیڈ بنانا ہے۔

پاکستانی ٹیم 15ستمبر سے شروع ہونے والے ایشیا کپ میں شرکت کے لیے متحدہ عرب امارات میں موجود ہے اور قومی ٹیم اپنا پہلا میچ 16ستمبر کو کوالیفائر ٹیم ہانک کانگ سے کھیلے گی۔

ایونٹ میں پاکستان اور دفاعی چیمپیئن بھارت کے درمیان میچ 19ستمبر کو شیڈول ہے جبکہ ایشیا کپ کا فائنل 28ستمبر کو کھیلا جائے گا۔