۔ — فائل فوٹو

کوئٹہ: بلوچستان کے علاقے چاغی میں ایک چینی کمپنی کو ایندھن فراہم کرنے والے چار آئل ٹینکروں کو نامعلوم مسلح افراد نے آگ لگادی۔

لیویز اہلکار غلام حیدر نے ڈان ڈاٹ کام کو بذریعہ ٹیلی فون بتایا کہ ضلع چاغی میں سونے اور تانبے کے ایک منصوبے کے لیے کام کررہی چینی کمپنی کو سپلائی کرنے والے ان ٹینکروں پر شدت پسندوں نے حملہ کردیا۔

انہوں نے بتایا کہ حملے کے بعد چاروں ٹینکروں میں آگ لگ گئی جبکہ جائے وقوع پردھوئیں کے بادل اور آگ دیکھی جاسکتی تھی۔

حیدر کا کہنا تھا کہ لیویز کے پاس عسکریت پسندوں کے تعداد کے حوالے سے کو اطلاعات نہیں ہیں جبکہ واقعے میں کسی کوئی جانے نقصان نہیں ہوا۔

واضح رہے کہ اسی کمپنی کے لیے انندھن لے جانے والے ایک ٹینکر کو تقریباً ایک ہفتہ قبل عسکریت پسندوں نے مستونگ کے قریب آگ لگادی تھی۔

دوسری جانب ایک الگ واقعے میں لیویز نے ایک سات سالہ بچے کو بلوچستان کے علاقے قلعہ عبداللہ سے بازیاب کروالیا جبکہ آپریشن کے دوران تین اغوا کاروں کو گرفتار کرلیا گیا۔