وزیر خارجہ شاہ محمود قریشی نے کہا ہے کہ وزیر اعظم عمران خان کی عالمی اقتصادی فورم کے موقع پر امریکی صدر ڈونلڈ ٹرمپ سے ملاقات مفید رہی اور امریکی صدر نے انہیں جلد دورہ پاکستان کی یقین دہانی کرائی ہے۔

وزیر اعظم عمران خان اور وزیر خارجہ شاہ محمود قریشی ان دنوں عالمی اقتصادی فورم میں شرکت کے سلسلے میں سوئٹزر لینڈ کے شہر ڈیووس میں موجود ہیں جہاں اس فورم میں امریکی صدر سمیت دیگر عالمی رہنما شریک ہیں۔

مزید پڑھیں: افغانستان میں جنگ بندی کے امکانات موجود ہیں، عمران خان

وزیر خارجہ شاہ محمود قریشی نے کہا کہ فورم کے موقع پر عمران خان اور ڈونلڈ ٹرمپ کے درمیان اہم ملاقات ہوئی جو ایک گھنٹے تک جاری رہی۔

ملاقات کے دوران موجود شاہ محمود قریشی نے کہا کہ صدر ٹرمپ کی پوری ٹیم ملاقات میں موجود تھی جس میں اچھے ماحول میں گفتگو ہوئی اور وزیر اعظم عمران خان نے اس دوران اہم امور پر تبادلہ خیال کیا۔

انہوں نے کہا کہ عمران خان نے امریکی صدر کے سامنے ایف اے ٹی ایف کی گرے لسٹ سے پاکستان کا نام نکالنے کا معاملہ اٹھایا اور پاکستان کی جانب سے اس سلسلے میں کیے گئے اقدامات پر بریفنگ دی جس پر صدر ٹرمپ نے انہیں اس معاملے میں حمایت کی یقین دہانی کرائی۔

یہ بھی پڑھیں: امریکی صدر کی ایک بار پھر 'مسئلہ کشمیر' کے حل میں کردار ادا کرنے کی پیشکش

وزیراعظم نے امریکی صدر کو ٹریول ایڈوائزی میں بہتری کی درخواست کرنے کے ساتھ ساتھ تجارت کے حوالے سے بھی بات کی جس کے بعد فیصلہ کیا گیا کہ امریکا کا ایک تجارتی وفد پاکستان کا دورہ کرے گا۔

دوران ملاقات خطے کی صورتحال خصوصاً مسئلہ کشمیر پر بھی گفتگو ہوئی اور وزیراعظم عمران خان نے مقبوضہ کشمیر کی صورتحال اور وہاں معصوم کشمیریوں پر بھارتی ظلم و استبداد کی تفصیلات سے امریکی صدر کو آگاہ کیا۔

امریکی صدر نے کہا کہ کشمیر کی صورتحال پر تشویش ہے اور اس مسئلے کے حل پر زور دیتے ہوئے یقین دلایا کہ وہ کشمیر کے معاملے پر بات کریں گے۔

مزید پڑھیں: وزیراعظم عمران خان 'عالمی اقتصادی فورم' میں شرکت کیلئے ڈیووس پہنچ گئے

وزیر اعظم نے مشرق وسطیٰ میں امریکا اور ایران کے درمیان کشیدگی کے ساتھ ساتھ افغانستان امن عمل اور وہاں سے امریکی افواج کے انخلا کے حوالے سے بھی تبادلہ خیال کیا۔

واضح رہے کہ جولائی 2018 میں عمران خان کے وزیر اعظم بننے کے بعد سے اب تک یہ دونوں رہنماؤں کے درمیان تیسری ملاقات ہے۔

منگل کو دونوں رہنماؤں کے درمیان ملاقات سے قبل امریکی صدر ڈونلڈ ٹرمپ نے کہا تھا کہ امریکا اور پاکستان کے درمیان پہلے کبھی بھی اتنی قربت نہیں تھی جتنی اب ہے۔