عالمی ادارہ صحت (ڈبلیو ایچ او) نے چین سے پھیلنے والے کورونا وائرس کے خلاف پاکستانی حکومت کے اقدامات پر اطمینا کا اظہار کرتے ہوئے اس حوالے سے تعاون کا عزم کیا۔

سرکاری نیوز ایجنسی اے پی پی کی رپورٹ کے مطابق پاکستان میں ڈبلیو ایچ او کے نمائندے ڈاکٹر پالیتھا ماہی پالا کا کہنا تھا کہ ‘حکومت کی جانب سے کورونا وائرس سے نمٹنے کے لیے کیے گئے فوری اقدامات سے میں متاثر ہوا ہوں’۔

ان کا کہنا تھا کہ ‘ڈبلیو ایچ اور ہر قدم پر تعاون کرنے کے لیے پرعزم ہے’۔

عالمی ادارہ صحت نے مزید اعلان کیا کہ کورونا وائرس سے نمٹنے، مدافعتی اقدامات اور تیاریوں کے لیے حکومت سے مزید تعاون کریں گے۔

یہ بھی پڑھیں:سندھ حکومت نے کورونا وائرس کے کنٹرول کیلئے ٹاسک فورس قائم کردی

یاد رہے کہ پاکستان میں کورونا وائرس کا پہلا کیس 26 فروری کو کراچی میں سامنے آیا تھا جس کے فوری بعد وزیراعظم کے معاون خصوصی ڈاکٹر ظفر مرزا نے کوئٹہ میں پریس کانفرنس کرتے ہوئے دوسرے کیس بھی تصدیق کی تھی۔

بعد ازاں 29 فروری کو اسلام آباد میں معاون خصوصی برائے اطلاعات و نشریات فردوس عاشق اعوان کے ہمراہ پریس کانفرنس میں ڈاکٹر ظفر مرزا نے کہا تھا کہ پاکستان میں کورونا وائرس کے مزید 2 کیسز سامنے آگئے ہیں اور مجموعی تعداد 4 ہوگئی ہے۔

ان کا کہنا تھا کہ کورونا وائرس کا ایک کیس سندھ اور دوسرا وفاق میں رپورٹ ہوا ہے جبکہ پہلے رپورٹ ہونے والے مریض تیزی سے روبصحت ہیں۔

دوسری جانب محکمہ صحت سندھ نے بھی کراچی میں کورونا وائرس کے نئے مریض کی تصدیق کی تھی۔

محکمہ صحت سندھ کی ترجمان نے بتایا کہ کراچی میں مذکورہ نئے کیسز کی تصدیق صبح 5 بجے ہوئی اور متاثرہ شخص نے حال ہی میں ایران کا دورہ کیا تھا۔

انہوں نے مزید بتایا کہ متاثرہ شخص سمیت ان تمام افراد کو اسکریننگ کے لیے قرنطینہ میں رکھا گیا ہے جن سے وہ رابطے میں رہا۔

مزید پڑھیں:پاکستان میں کورونا وائرس کے 2 نئے کیسز سامنے آگئے، ڈاکٹر ظفر مرزا

وزیراعظم کے معاون خصوصی نے میڈیا سے درخواست کی کہ وہ مریضوں سے متعلق ان کی ذاتی معلومات نشر کرنے سے گریز کریں۔

کورونا وائرس کے پیش نظر بلوچستان حکومت نے 26 فروری کو ہی تعلیمی اداروں کو 15 مارچ تک بند رکھنے کا اعلان کیا تھا جبکہ سندھ حکومت نے دو روز کے لیے بند رکھنے اعلان کیا تھا۔

بعد ازاں سندھ حکومت نے یکم مارچ کو وزیراعلیٰ کی زیر صدارت اجلاس میں صوبے بھر میں تعلیمی اداروں کو 13 مارچ 2020 تک بند رکھنے کا اعلان کیا۔

خیال رہے کہ سندھ حکومت نے پاکستان میں کورونا وائرس کے کیسز سامنے آنے کے بعد 27 فروری کو وائرس کے کنٹرول کے لیے ٹاسک فورس قائم کردی تھی۔

ٹاسک فورس کی سربراہی وزیر اعلیٰ خود کریں گے جس میں چیف سیکریٹری، سیکریٹری صحت، کراچی کمشنر اور دیگر صحت حکام شامل ہیں اور اس کے اب 4 اجلاس ہوچکے ہیں۔