قومی ٹیم کے 6 کھلاڑیوں کا کورونا ٹیسٹ دوبارہ منفی، انگلینڈ میں اسکواڈ کا حصہ بن سکیں گے

اپ ڈیٹ 07 جولائ 2020
پاکستان کرکٹ ٹیم دورہ انگلینڈ پر موجود ہے—فائل فوٹو: اے ایف پی
پاکستان کرکٹ ٹیم دورہ انگلینڈ پر موجود ہے—فائل فوٹو: اے ایف پی

پاکستان کرکٹ ٹیم کے 6 کھلاڑیوں کے کورونا وائرس کے ٹیسٹ 2 مرتبہ منفی آنے کے بعد اب یہ تمام کھلاڑی انگلینڈ میں موجود قومی ٹیم کا حصہ بننے کے اہل ہوگئے۔

اس ضمن میں پاکستان کرکٹ بورڈ (پی سی بی) کے جاری کردہ ایک بیان میں کہا گیا کہ فخرزمان، محمد حسنین، محمد حفیظ، محمد رضوان، شاداب خان اور وہاب ریاض کے گزشتہ 3 روز میں کووڈ 19 کے 2 ٹیسٹ منفی آئے۔

مزید پڑھیں: قومی ٹیم دورہ انگلینڈ کے لیے مانچسٹر روانہ

پی سی بی کے مطابق ان نتائج کے منفی آنے کے بعد اب یہ تمام کھلاڑی وورسٹر شائر میں موجود قومی کرکٹ ٹیم کو جوائن کرسکیں گے۔

بیان میں بتایا گیا کہ پاکستان کرکٹ بورڈ ان تمام کھلاڑیوں کے سفری انتظامات کر رہا ہے اور ان کی روانگی کی تفصیلات جلد جاری کردی جائے گی۔

خیال رہے کہ 28 جون کو پاکستانی ٹیم 3 ٹیسٹ اور تین ٹی 20 میچوں کی سیریز کے لیے دورہ انگلینڈ پر روانہ ہوئی تھی، جس میں وہ 10 کھلاڑی شامل نہیں تھے جن کے کورونا کے ٹیسٹ مثبت آئے تھے۔

دورہ انگلینڈ کے لیے قومی ٹیم کے ابتدائی طور پر 29رکنی اسکواڈ کا اعلان کیا گیا تھا تاہم اعلان کردہ کھلاڑیوں کے ٹیسٹ لیے گئے تو 10 کھلاڑیوں اور ایک اسٹاف کے رکن میں کورونا کی تصدیق ہوئی تھی۔

بعد ازاں پاکستان کرکٹ بورڈ نے کورونا وائرس کا شکار ان 10 کھلاڑیوں کے بغیر 20 رکنی اسکواڈ کا اعلان کیا تھا حالانکہ ان میں سے 6 کھلاڑیوں کے ٹیسٹ 27 جون کو منفی آنے کا انکشاف ہوا تھا۔

اس حوالے سے ایک بیان میں پی سی بی نے بتایا تھا کہ محمد حسنین، شاداب خان، فخر زمان، محمد رضوان، محمد حفیظ اور وہاب ریاض کا ٹیسٹ منفی آیا ہے تاہم وہ انگلینڈ جانے والی 20 رکنی ٹیم میں شامل ہونے سے قبل ایک مرتبہ پھر ٹیسٹ کے عمل سے گزریں گے۔

یہ بھی پڑھیں: پاکستان کے 6 کھلاڑیوں کا کووڈ-19 کا ٹیسٹ منفی آگیا

یاد رہے کہ پاکستان کرکٹ نے جس 20 رکنی اسکواڈ کا اعلان کیا تھا اس میں اظہر علی، بابر اعظم، عابد علی، اسد شفیق، فہیم اشرف، فواد عالم، عامد وسیم، امام الحق، خوشدل شاہ، محمد موسیٰ، محمد عباس، نسیم شاہ، روحیل نذیر، سرفراز احمد، شاہین شاہ آفریدی، شان مسعود، سہیل خان، عثمان شنواری، اور یاسر شاہ شامل ہیں۔

اس کے علاوہ اسپورٹس اسٹاف مصباح الحق، یونس خان، منیجر منصور رانا، مشتاق احمد، شاہد اسلم، عبدالمجید، طلحہٰ بٹ، یاسر ملک، ڈاکٹر سہیل سلیم، کرنل ریٹائرڈ عثمان انوری اور رضا کچلیو شامل ہیں۔

ضرور پڑھیں

تبصرے (0) بند ہیں