ملک میں کورونا سے مزید ایک ہزار 971 متاثر، اموات ساڑھے 5 ہزار سے متجاوز

اپ ڈیٹ 18 جولائ 2020
ملک میں صحتیاب مریضوں کی تعداد ایک لاکھ 83 ہزار 737 ہوگئی ہے—تصویر: اے ایف پی
ملک میں صحتیاب مریضوں کی تعداد ایک لاکھ 83 ہزار 737 ہوگئی ہے—تصویر: اے ایف پی

پاکستان میں کورونا وائرس کی صورتحال میں کچھ حد تک بہتری دیکھی گئی ہے اور یومیہ رپورٹ ہونے والے کیسز کی تعداد میں کمی واقع ہوئی ہے۔

ملک میں کورونا وائرس سے ہونے والی بیماری کووِڈ 19 سے متاثر ہونے والوں کی مجموعی تعداد 2 لاکھ 61 ہزار 372 تک پہنچ چکی ہے جبکہ 5 ہزار 514 افراد لقمہ اجل بن چکے ہیں۔

سرکاری اعداد و شمار کے مطابق ملک میں 17 جولائی بروز جمعہ کو ایک ہزار 971 نئے کیسز اور 49 اموات رپورٹ ہوئیں جبکہ 5 ہزار مریض صحتیاب ہوئے۔

گزشتہ چند ہفتوں سے ملک میں کورونا وائرس کے کیسز اور اموات کی تعداد میں کمی دیکھی گئی اور یومیہ 5 سے 6 ہزار تک رپورٹ ہونے والے کیسز اب 2 سے 3 ہزار تک پہنچ گئے ہیں جبکہ یومیہ سامنے آنے والی 100 سے زائد اموات بھی کم ہوکر 2 ہندسوں پر آگئی ہیں۔

یہی نہیں بلکہ صحتیاب افراد کی تعداد میں تیزی سے اضافے نے ملک میں فعال کیسز کی تعداد کو بھی کافی حد تک کم کردیا ہے اور اس وقت ملک میں 70 فیصد بیمار شفایاب ہوچکے ہیں۔

واضح رہے کہ ملک میں کورونا وائرس کے پہلے 2 کیسز ایک ہی دن یعنی 26 فروری کو سامنے آئے تھے جس کے بعد اس وبا کو یہاں ساڑھے 4 ماہ سے زائد کا عرصہ گزرچکا ہے اور اس دوران جون میں یہ وبا اپنے عروج پر دیکھی گئی۔

فروری کے آخری 4 روز سے مارچ کی 31 تاریخ تک ملک میں 2 ہزار کے لگ بھگ کیسز اور 26 اموات رپورٹ ہوئی تھیں۔

اپریل کے اختتام تک کیسز بڑھ کر ساڑھے 16 ہزار جبکہ اموات 385 تک پہنچ گئیں تاہم مئی میں صورتحال کافی تبدیل ہوئی اور کیسز 71 ہزار اور اموات 1500 سے تجاوز کرگئیں۔

لاک ڈاؤن میں نرمی کے بعد جون میں وائرس کی تشویشناک صورتحال دیکھنے میں آئی اور کیسز بڑھ کر 2 لاکھ 12 ہزار اور اموات 4300 سے تجاوز کر گئیں۔

حالانکہ جون کے مقابلے میں جولائی کا مہینہ وبا کے پھیلاؤ میں کمی کے لحاظ سے صورتحال بہتر ہونے کی نشاندہی کررہا ہے تاہم نئے کیسز اور اموات رپورٹ ہونے کا سلسلہ اب بھی جاری ہے۔

سندھ

سندھ میں کورونا وائرس کے یومیہ کیسز میں خاطر خواہ کمی دیکھنے میں نہیں آرہی اور آج بھی مزید ایک ہزار 170 افراد میں اس وائرس کی تشخیص ہوئی ہے۔

وزیراعلیٰ سندھ کے مطابق گزشتہ 24 گھنٹوں کے دوران وائرس سے مزید 30 مریض انتقال کر گئے جبکہ 14 ہزار مریض صحتیاب ہونے میں کامیاب رہے۔

نئے کیسز کے بعد صوبہ سندھ میں کورونا متاثرین کی تعداد ایک لاکھ 11 ہزار 238 اور اموات کی تعداد ایک ہزار 952 تک جا پہنچی۔

پنجاب

صوبہ پنجاب میں کورونا وائرس کے مزید 484 نئے کیسز سامنے آئے اور 8 اموات کا اضافہ ہوا۔

ملک میں کورونا کی صورتحال کی نگرانی کے لیے قائم سرکاری پورٹل کے مطابق صوبے میں گزشتہ 24 گھنٹوں میں مجموعی کیسز 484 کے اضافے کے بعد 89 ہزار 23 ہوگئے ہیں۔

دوسری جانب صوبے میں مزید 8 مریض دم توڑ گئے اور یوں مرنے والوں کی مجموعی تعداد 2 ہزار 59 ہوگئی۔

اسلام آباد

وفاقی دارالحکومت اسلام آباد میں کورونا وائرس نے مزید 52 افراد کو متاثر کیا جبکہ ایک مریض انتقال کرگیا۔

حکومتی اعداد و شمار کے مطابق شہر اقتدار میں گزشتہ 24 گھنٹوں کے دوران مزید 52 افراد میں وائرس کی تشخیص سے مجموعی کیسز 14 ہزار 454 ہوگئے ہیں۔

اس کے علاوہ ایک اور فرد کے انتقال سے وہاں اب مجموعی اموات کی تعداد 157 ہوچکی ہے۔

بلوچستان

محکمہ صحت بلوچستان نے کورونا کے 20 نئے کیسز کی تصدیق کی جس کے بعد متاثرہ افراد کی تعداد 11 ہزار 405 ہوگئی۔

صوبے میں مزید 3 افراد وائرس کا شکار ہو کر زندگی کی بازی ہار گئے جس کے بعد یہاں اموات کی تعداد 131 ہوگئی ہے۔

خیبر پختونخوا

محکمہ صحت خیبر پختونخوا کی جانب سے وائرس کے مزید 183 کیسز کی تصدیق کی گئی جس کے بعد یہاں متاثرین کی تعداد 31 ہزار 669 ہوگئی۔

صوبے میں کورونا کے مزید 6 مریض جاں بحق بھی ہوئے جس کے بعد اموات بڑھ کر 1130 ہوگئی ہیں۔

گلگت بلتستان

گلگت بلتستان میں کورونا وائرس کی صورتحال خاصی حد تک کنٹرول میں دیکھی گئی تاہم گزشتہ 24 گھنٹوں میں 25 نئے مریض سامنے آئے اور ایک ہلاکت رپورٹ ہوئی۔

سرکاری اعداد و شمار کے مطابق ان 25 نئے کیسز کے بعد مجموعی طور پر کیسز کی تعداد ایک ہزار 750 تک پہنچ گئی ہے جبکہ ایک اور مریض کے جاں بحق ہونے سے اموات کی تعداد 39 ہوگئی ہے۔

آزاد کشمیر

آزاد کشمیر میں گزشتہ چند روز کے دوران کورونا وائرس کے کیسز میں خاصہ اضافہ دیکھا گیا ہے اور اب یہاں متاثرہ مریضوں کی تعداد گلگت بلتستان سے بھی تجاوز کر چکی ہے۔

سرکاری اعداد و شمار کے مطابق آزاد کشمیر میں گزشتہ 24 گھنٹوں میں 37 افراد متاثر ہوئے اور یوں مجموعی کیسز ایک ہزار 808 تک پہنچ گئے۔

صحتیاب افراد

خوش آئند بات یہ ہے کہ ملک میں صحتیاب ہونے والوں کی تعداد تیزی سے بڑھ رہی ہے جو امید اور حوصلے کا باعث ہے۔

سرکای اعداد و شمار کے مطابق گزشتہ 24 گھنٹوں میں مزید 5 ہزار اس بیماری سے صحتیابی کی جانب لوٹ آئے۔

اس طرح ملک میں مجموعی صحتیاب مریضوں کی تعداد ایک لاکھ 83 ہزار 737 ہوگئی ہے۔

مجموعی صورتحال

ملک میں عالمی وبا کے کیسز، اموات اور صحتیاب افراد کی تعداد میں اضافے کے بعد اگر مجموعی صورتحال پر نظر ڈالیں تو وہ کچھ اس طرح ہے:

مصدقہ کیسز: 261372

اموات: 5514

صحتیاب: 183737

فعال کیسز: 72121

ملک میں اس وائرس سے سب سے زیادہ متاثرہ علاقے صوبہ سندھ اور صوبہ پنجاب ہیں، صوبہ سندھ میں کیسز ایک لاکھ 11 ہزار 238 ہیں تو وہیں پنجاب میں کیسز کی تعداد دوسرے نمبر پر یعنی 89 ہزار 23 تک پہنچ چکی ہے۔

صوبہ خیبرپختونخوا میں کورونا وائرس سے 31 ہزار 669 افراد متاثر ہوچکے ہیں جبکہ صوبہ بلوچستان میں وبا میں مبتلا ہونے والوں کی تعداد 11 ہزار 405 ہے۔

علاوہ ازیں وفاقی دارالحکومت اسلام آباد میں 14 ہزار 454، گلگت بلتستان میں ایک ہزار 775 اور آزاد کشمیر ایک ہزار 808 افراد اس وائرس سے متاثر ہوئے۔

ملک میں اموات کی صورتحال کچھ یوں ہے:

پنجاب: 2059

سندھ: 1952

خیبرپختونخوا: 1130

بلوچستان: 131

اسلام آباد: 157

آزاد کشمیر: 46

گلگت بلتستان: 39

پاکستان میں کورونا وائرس کیسز اور اموات

خیال رہے کہ ملک میں کورونا وائرس کا پہلا کیس 26 فروری 2020 کو کراچی میں سامنے آیا تھا اور 25 مارچ تک کیسز کی تعداد ایک ہزار تک پہنچ چکی تھی۔

تاہم اس کے بعد مذکورہ وائرس نے پاکستان میں اپنے پنجے گاڑنا شروع کردیے اور اب تک 2 لاکھ 50 ہزار سے زائد افراد کورونا وائرس سے متاثر ہوچکے ہیں، جبکہ اموات 5 ہزار سے زائد ہیں۔

ملک میں کورونا وائرس کے پہلے کیس سے لے کر اب تک کیا صورتحال رہی اور کس روز کتنے کیسز اور اموات سامنے آئیں؟ مکمل تفصیل جاننے کے لیے یہاں کلک کریں۔

ضرور پڑھیں

تبصرے (0) بند ہیں