مظفر گڑھ کے علاقے لیشاری والا میں شادی کے تنازع پر دو کم سن لڑکیوں کو آگ لگا دی گئی جس سے گھر کے دیگر افراد بھی متاثر ہوگئے۔

ڈان اخبار کی رپورٹ کے مطابق حافظ عبدالحمید اور ان کے اہل خانہ سو رہے تھے کہ اس دوران فدا حسین اپنے ساتھیوں کے ہمراہ ان کے گھر میں داخل ہوئے اور میاں بیوی کو یرغمال بنا کر ان کے چار بچوں کو آگ لگادی۔

یہ بھی پڑھیں: دادو: شادی کے تنازع پر گھر میں دو لڑکیوں پر فائرنگ، ایک ہلاک

ملزمان کی لگائی گئی آگ سے دو سالہ بچی عروا اور اسوہ جھلس کر موقع پر ہی دم توڑ گئیں جبکہ دیگر دو بچوں کو زخمی حالت میں ڈی ایچ کیو منتقل کردیا گیا۔

حافظ عبدالحمید اور ان کی اہلیہ نے جب پڑوسیوں کو مدد کے لیے پکارا تو ملزمان نے انہیں تشدد کا نشانہ بنایا۔

رپورٹ کے مطابق حافظ عبدالحمید نے چند ماہ قبل فدا حسین کی بیٹی سے دوسری شادی کی تھی لیکن گزشتہ ہفتے پنچایت کے فیصلے کے بعد انہوں نے فدا حسین کی بیٹی کو طلاق دے دی تھی۔

ملزم فدا حسین نے اسی تنازع پر عبدالحمید کے گھر پر حملہ کیا۔

پولیس نے فدا حسین اور دیگر تین ملزمان کے خلاف تعزیرات پاکستان (پی پی سی) کی دفعات 302، 148، 149، 324 اور انسداد دہشت گردی ایکٹ (سیون اے ٹی اے) کے تحت مقدمہ درج کر لیا۔

پولیس نے مرکزی ملزم اور دیگر دو افراد کو گرفتار بھی کر لیا۔

ڈسٹرکٹ پولیس افسر نے دعویٰ کیا کہ دو ملزمان کو چوک کرم داد قریشی کے علاقے سے گرفتار کیا اور ان کے قبضے سے 56 کلو چرس برآمد کرلی ہے۔

مزید پڑھیں: ملتان:رشتے کے تنازع پر فائرنگ سے 5 افراد ہلاک، ملزم نے خود کشی کرلی

یاد رہے کہ ستمبر 2020 میں صوبہ سندھ کے ضلع دادو کے گاؤں سوبدار واہ میں بھی شادی کے تنازع پر دو نامعلوم افراد نے کم عمر لڑکیوں پر ان کے گھر میں فائرنگ کردی تھی جس کے نتیجے میں ایک موقع پر ہی دم توڑ گئی تھی جبکہ دوسری شدید زخمی ہوگئی تھیں۔

ڈی ایس پی شاہ پیر بخش چانڈیو نے کہا تھا کہ فائرنگ کی اطلاع ملنے کے بعد پولیس مقتولہ لڑکی کے گھر پہنچی البتہ ملزمان فرار ہو گئے جبکہ یہ واقعہ شادی کے تنازع کی وجہ سے پیش آیا۔

ایس ایچ او غلام حیدر نے بتایا تھا کہ پولیس کو شک ہے کہ لڑکیوں پر ان کے چچا اور کزن نے فائرنگ کی ہے اور اس کی وجہ شادی کا تنازع معلوم ہوتا ہے۔