• KHI: Maghrib 7:22pm Isha 8:51pm
  • LHR: Maghrib 7:08pm Isha 8:47pm
  • ISB: Maghrib 7:19pm Isha 9:03pm
  • KHI: Maghrib 7:22pm Isha 8:51pm
  • LHR: Maghrib 7:08pm Isha 8:47pm
  • ISB: Maghrib 7:19pm Isha 9:03pm

بھارتی گلوکار میکا سنگھ کی شادی کی افواہیں

شائع April 3, 2021
اپریل فول کے موقع پر شیئر کی گئی ویڈیو کے بعد گلوکار کی شادی کی افواہیں پھیلیں—اسکرین شاٹ/ یوٹیوب
اپریل فول کے موقع پر شیئر کی گئی ویڈیو کے بعد گلوکار کی شادی کی افواہیں پھیلیں—اسکرین شاٹ/ یوٹیوب

’رانی تو، میں راجا، حسینہ پاگل دیوانی، اکھیوں سے گولی مارے، ساون میں لگ گئی آگ‘ سمیت متعدد پرانے مقبول گانوں کو نئے انداز میں گانے والے گلوکار میکا سنگھ کی جانب سے اپریل فول کے موقع پر اداکارہ کے ساتھ ویڈیو سامنے آنے کے بعد ان کی شادی کی افواہیں ہیں۔

بھارتی فلموں اور ڈراموں کی اداکارہ آکنشا پوری نے اپریل فول کے موقع پر میکا سنگھ کے ساتھ گردوارے میں بنائی گئی ایک مختصر ویڈیو شیئر کی، جس کے بعد ان دونوں کی شادی اور منگنی کی افواہیں پھیل گئیں۔

مختصر ویڈیو میں آکنشا پوری اور میکا سنگھ کو گردوارے میں عبادت کرتے ہوئے دیکھا جا سکتا ہے۔

یہ بھی پڑھیں: پاکستان میں پرفارم کرنے پر بھارت میں میکا سنگھ کے بائیکاٹ کا اعلان

تاہم ویڈیو کے کیپشن میں آکنشا پوری نے میکا سنگھ کو مینشن کرتے ہوئے دل کا ایموجی بنانے سمیت ایک ساتھ رہنے اور شکرانے کے ہیش ٹیگ استعمال کیے، جس وجہ سے ان کی شادی کی افواہیں پھیل گئیں۔

دونوں کے مداحوں نے ان کی ویڈیو پر انہیں مبارک باد پیش کرتے ہوئے ان کے لیے نیک خواہشات کا اظہار بھی کیا اور بعض افراد نے تصحیح کی کہ دونوں کی شادی نہیں بلکہ منگنی ہوئی ہے۔

دونوں کی ایک ساتھ ویڈیو سامنے آنے کے بعد سوشل میڈیا پر ان کی منگنی اور شادی کی افواہیں پھیلنے کے بعد اداکارہ آکنشا پوری نے بھی خاموشی توڑتے ہوئے ایک انٹرویو میں واضح کیا کہ ویڈیو کا کیا معاملہ ہے۔

آکنشا پوری نے ٹائمز آف انڈیا سے بات کرتے ہوئے کہا کہ ان کے اور میکا سنگھ کے درمیان گزشتہ 12 سال سے تعلقات ہیں اور وہ ایک خاندان کی طرح ہیں۔

آکنشا پوری کا کہنا تھا کہ ان دونوں کے درمیان احترام کا رشتہ ہے اور حال ہی میں دونوں نے گردوارے میں ایک ساتھ عبادت کا پروگرام اس وقت بنایا جب اداکارہ میکا سنگھ کی دعوت پر ان کے گھر گئی تھیں۔

مزید پڑھیں: پاکستان میں پرفارمنس کرنے پر میکا سنگھ پر عائد پابندی ختم کردی گئی

اداکارہ نے واضح کیا کہ انہوں نے نہ تو منگنی کی ہے اور نہ ہی مستقبل قریب میں ان کا ایسا کوئی ارادہ ہے، البتہ وہ پچھلے کئی سال کی طرح آئندہ بھی ساتھ رہیں گے اور انہوں نے اسی بات پر ہی ساتھ رہنے اور شکرانے کے ہیش ٹیگ استعمال کیے۔

اداکارہ آکنشا پوری نے واضح طور پر یہ نہیں بتایا کہ وہ مستقبل میں میکا سنگھ سے منگنی یا رشتہ کریں گی یا نہیں، تاہم انہوں نے کہا کہ مستقبل قریب میں ان کا منگنی کرنے کا کوئی ارادہ نہیں ہے۔

اگرچہ میکا سنگھ کو نہ صرف بھارت بلکہ پاکستان سمیت خطے کے دیگر ممالک میں بھی شہرت حاصل ہے، تاہم آکنشا پوری کو زیادہ تر جنوبی ہندوستان کی شوبز انڈسٹری میں شہرت حاصل ہے اور وہ زیادہ تر تامل، تیلگو، کنڈا اور پنجابی فلموں میں دکھائی دیتی ہیں۔

تاہم آکنشا پوری بگ باس سمیت دیگر ریئلٹی شوز میں بھی شریک ہو چکی ہیں جب کہ انہوں نے بعض بھارتی ٹی وی ڈراموں میں بھی کام کیا ہے۔

کارٹون

کارٹون : 13 جون 2024
کارٹون : 12 جون 2024