میگا کرپشن کیس میں احتساب عدالت نے محفوظ فیصلہ سناتے ہوئے سابق مشیر خزانہ خالد لانگو کو 26 ماہ اور سابق سیکریٹری خزانہ مشتاق رئیسانی کو 10 سال قید کی سزا سنادی۔

کوئٹہ کی احتساب عدالت ون میں سابق مشیر خزانہ خالد لانگو اور سابق سیکریٹری خزانہ مشتاق رئیسانی سمیت دیگر ملزمان پیش ہوئے۔

جج منور شاہوانی نے میگا کرپشن کیس کا محفوظ فیصلہ سناتے ہوئے سابق سیکریٹری خزانہ مشتاق رئیسانی کو 10 سال اور سابق مشیر خزانہ خالد لانگو کو 26 ماہ قید کی سزا کا حکم دیا۔

ملزمان کی سزا ان کے ٹرائل کے دوران گرفتاری کے وقت سے شروع ہوگی۔

عدالت نے مشتاق رئیسانی کی تمام جائیداد ضبط کرنے کا بھی حکم جاری کیا۔

احتساب عدالت نے سابق سیکریٹری بلدیات عبدالباسط اور سابق سیکریٹری لوکل کونسل فیصل جمال کو بری کردیا۔

یہ بھی پڑھیں: میگاکرپشن اسکینڈل: مشتاق رئیسانی اور خالد لانگو کی ضمانت منظور

بلوچستان میگا کرپشن اسکینڈل

واضح رہے کہ میگا کرپشن کیس کا فیصلہ ایک ماہ قبل محفوظ کیا گیا تھا جو عدالت میں 5 سال چلتا رہا۔

مشتاق رئیسانی کو نیب حکام نے 6 مئی 2016 کو بد عنوانی کے الزام میں سول سیکریٹریٹ کوئٹہ میں ان کے دفتر سے گرفتار کیا تھا۔

گرفتاری کے بعد مشتاق رئیسانی کے گھر پر چھاپے کے دوران 73 کروڑ روپے کے نوٹ، 4 کروڑ روپے کا سونا، لاکھوں روپے مالیت کے پرائز بانڈز اور سیونگ سرٹیفکیٹس، ڈالر اور پاؤنڈز کی گڈیاں اور مختلف جائیدادوں کے کاغذات برآمد کیے تھے۔

اتنی بڑی رقم کو گننے میں نیب کے اہلکاروں کو 7 گھنٹے سے زائد کا وقت لگا، پاکستانی اور غیر ملکی کرنسی کے ساتھ پرائز بانڈز، سیونگ سرٹیفکیٹس گننے کے لیے اسٹیٹ بینک سے مشینیں بھی منگوائی گئی تھیں۔

مشتاق رئیسانی کی گرفتاری کے بعد وزیراعلیٰ بلوچستان کے مشیر برائے خزانہ میر خالد خان لانگو بھی مستعفی ہو گئے تھے، ان کا کہنا تھا کہ وہ تحقیقات مکمل ہونے تک کوئی عہدہ قبول نہیں کریں گے۔

مزید پڑھیں: میگاکرپشن اسکینڈل: مشتاق رئیسانی کی پلی بارگین درخواست منسوخ

بعد ازاں قومی احتساب بیورو (نیب) نے سابق سیکریٹری خزانہ بلوچستان مشتاق رئیسانی، سابق صوبائی مشیر خزانہ خالد لانگو سمیت 6 ملزمان کے خلاف کرپشن ریفرنس دائر کیا تھا۔

بعد ازاں کیس میں گرفتار ٹھیکیدار سہیل مجید اور اس کے بھائی کو پلی بارگین کے بعد رہا کردیا گیا تھا۔