’اومیکرون‘ کے باعث کترینہ کی شادی کی تقریبات کے رنگ پھیکے پڑنے کا امکان

01 دسمبر 2021
دونوں ممکنہ طور پر اگلے ہفتے شادی کے بندھن میں بندھ جائیں گے—فائل فوٹو: ٹوئٹر
دونوں ممکنہ طور پر اگلے ہفتے شادی کے بندھن میں بندھ جائیں گے—فائل فوٹو: ٹوئٹر

دنیا بھر میں کورونا کی نئی لہر ’اومیکرون‘ کے تیزی سے پھیلنے کے بعد خدشہ ظاہر کیا جا رہا ہے کہ بولی وڈ بار بی ڈول کترینہ کیف اور وکی کوشل کی شادی کی تقریبات کے رنگ پھیکے پڑنے کے امکانات ہیں۔

تاہم اس کے باوجود بھارتی میڈیا نے اپنی رپورٹس میں دعویٰ کیا ہے کہ وکی کوشل اور کترینہ کیف نے مہمانوں کی فہرست کو حتمی شکل دے دی اور حیران کن دعویٰ کیا جا رہا ہے کہ نئی فہرست میں سلمان خان کا نام بھی شامل ہے۔

ٹائمز آف انڈیا نے اپنی رپورٹ میں دعویٰ کیا کہ اگرچہ بھارت میں بھی ’اومیکرون‘ کے پھیلنے کا خدشہ ہے، تاہم اس کے باوجود وکی کوشل اور کترینہ کیف شادی کی تیاریوں میں مصروف ہیں اور انہوں نے مہمانوں کی فہرست کو حتمی شکل دے دی ہے،۔

رپورٹ میں نامعلوم ذرائع کا حوالہ دیتے ہوئے دعویٰ کیا گیا کہ دونوں اداکار دسمبر کے اوائل میں ہی راجستھان کے سکس سینز ریزورٹ میں شادی کریں گے، جس میں شرکت کے لیے مختلف شوبز، سیاسی، سماجی و کاروباری شخصیات کو مدعو کیا جا رہا ہے۔

دونوں نے خود اس حوالے سے کوئی بیان نہیں دیا—فوٹو: انسٹاگرام
دونوں نے خود اس حوالے سے کوئی بیان نہیں دیا—فوٹو: انسٹاگرام

رپورٹ کے مطابق مہمانوں کی نئی فہرست دیکھنے والے ذرائع نے تصدیق کی ہے کہ اس میں سلمان خان کا نام بھی شامل ہے جب کہ دیگر مہمانوں میں بوسو مارٹس اور کرن جوہر جیسی شخصیات شامل ہیں۔

یہ بھی پڑھیں: وکی و کترینہ شادی نہیں کر رہے: اہل خانہ، بھارتی میڈیا شادی کی خبروں پر بضد

رپورٹ میں بتایا گیا کہ ان دنوں سلمان خان بیرون ملک دورے پر ہیں جب کہ کورونا کی نئی لہر ’اومیکرون‘ پھیلنے کے خدشات کے پیش نظر واضح نہیں ہے کہ کون کون سی شخصیات شادی کی تقریبات میں شرکت کریں گی۔

رپورٹ میں دعویٰ کیا گیا کہ شادی کی تقریبات کے بعد جوڑا ممبئی میں ریسیپشن کی عالیشان تقریب بھی منعقد کرے گا۔

دوسری جانب انڈیا ٹوڈے نے بھی اپنی رپورٹ میں بتایا کہ بولی وڈ اداکار شادی کی تیاریوں میں مصروف ہیں اور دونوں نے مہمانوں کو دعوت دینا شروع کردی۔

رپورٹ میں بتایا گیا کہ شادی کی تقریبات میں ہدایت کارہ نتیا مہرا، روہت شیٹھی، کرن جوہر، علی عباس ظفر، سدھارتھ ملہوترا، کیارہ آڈوانی، ورون دھون اور ان کی اہلیہ سمیت دیگر شخصیات شرکت کریں گے۔

دونوں کے درمیان گزشتہ چند سال سے تعلقات کی خبریں ہیں—فائل فوٹو: انسٹاگرام
دونوں کے درمیان گزشتہ چند سال سے تعلقات کی خبریں ہیں—فائل فوٹو: انسٹاگرام

حیران کن بات یہ ہے کہ گزشتہ ہفتے تک بھارتی میڈیا دعویٰ کرتا رہا تھا کہ وکی کوشل اور کترینہ کیف نومبر کے آخر تک کورٹ میرج کرلیں گے، تاہم تاحال ان کی جانب سے عدالت میں شادی کرنے کی کوئی تصدیق یا تردید نہیں کی گئی۔

مزید پڑھیں: کس نے کہا میں شادی کر رہی ہوں؟ کترینہ کیف

علاوہ ازیں یہ بھی دعویٰ کیا گیا تھا کہ کترینہ کیف نے سلمان خان اور ان کے اہل خانہ کو شادی کی دعوت نہیں دی، تاہم اب بتایا جا رہا ہے کہ دبنگ ہیرو کا نام مہمانوں کی فہرست میں موجود ہے۔

دلچسپ بات یہ ہے کہ چار دن قبل ہی وکی کوشل کی خاتون کزن نے دعویٰ کیا تھا کہ ان کے کزن شادی نہیں کر رہے، بھارتی میڈیا میں پھیلنے والی خبریں غلط ہیں، تاہم اس کے باوجود بھارتی میڈیا بضد ہے کہ جوڑا شادی کی تیاریوں میں مصروف ہے۔

شادی کی افواہیں اور خبریں نشر ہونے کے باوجود تاحال کترینہ کیف اور وکی کوشل نے خود اس ضمن میں نہ تو کوئی تردید کی ہے اور نہ ہی کوئی تصدیق کی ہے۔

رپورٹس تھیں کہ پہلے دونوں نومبر کے آخر تک کورٹ میرج کریں گے—فائل فوٹو: انسٹاگرام
رپورٹس تھیں کہ پہلے دونوں نومبر کے آخر تک کورٹ میرج کریں گے—فائل فوٹو: انسٹاگرام

ضرور پڑھیں

تبصرے (0) بند ہیں