آسٹریلیا کی مشکلات میں اضافہ، ایگار بھی کورونا کا شکار ہوکر سیریز سے باہر

اپ ڈیٹ 29 مارچ 2022
جوش انگلس کا ٹیسٹ مثبت آنے کے 24 گھنٹوں کے اندر ہی ایگار بھی وائرس کا شکار ہو گئے — فائل فوٹو: اے ایف پی
جوش انگلس کا ٹیسٹ مثبت آنے کے 24 گھنٹوں کے اندر ہی ایگار بھی وائرس کا شکار ہو گئے — فائل فوٹو: اے ایف پی

آسٹریلین اسپنر ایشٹن ایگار کا کووڈ 19 کا ٹیسٹ مثبت آگیا ہے اور وہ وائرس کا شکار ہونے کے بعد پاکستان کے خلاف ون ڈے سیریز سے باہر ہو گئے ہیں۔

ایگار گزشتہ 24 گھنٹوں کے دوران وائرس کا شکار ہونے والے دوسرے آسٹریلین کھلاڑی ہیں، جہاں اس سے قبل جوش انگلس کا ٹیسٹ مثبت آیا تھا۔

مزید پڑھیں: بھارت سے آسٹریلین کرکٹر کو جان سے مارنے کی دھمکی، دورہ پاکستان کے خلاف سازش ناکام

کرکٹ آسٹریلیا نے منگل کی صبح تصدیق کی کہ جوش انگلس کا ٹیسٹ مثبت آنے کے 24 گھنٹوں کے اندر ہی ایگار بھی وائرس کا شکار ہو گئے ہیں اور ان کا ٹیسٹ بھی مثبت آ گیا ہے۔

بورڈ کے مطابق آسٹریلین کے فزیو تھراپسٹ برینڈن ولسن کا ٹیسٹ بھی مثبت آگیا ہے البتہ بقیہ تمام کھلاڑیوں اور عملے کے ٹیسٹ منفی آئے ہیں۔

ان دونوں کھلاڑیوں کا مثبت ٹیسٹ آنے سے آسٹریلین ٹیم کی مشکلات میں مزید اضافہ ہوگیا ہے کیونکہ سیریز سے قبل ہی آل راؤنڈر مشل مارش کولہے کی انجری کا شکار ہو کر پہلے ہی سیریز سے باہر ہو چکے ہیں۔

یہ بھی پڑھیں: آسٹریلیا کا ورلڈ کپ ہیرو مچل مارش پاکستان کے خلاف ایک روزہ سیریز سے باہر

آسٹریلیا کو اسٹیو اسمتھ کی خدمات بھی میسر نہیں ہوں گی جو ٹیسٹ سیریز کے دوران کہنی کی انجری کا شکار ہوئے تھے۔

آسٹریلیا کی ٹیم پہلے ون ڈے میچ میں دو اسپنرز کھلانے پر غور کر رہی ہے اور ایگار کے سیریز سے باہر ہونے کے بعد مچل سویپسن کے ڈیبیو کے امکانات بڑھ گئے ہیں جن کا ساتھ دینے کے لیے ایڈم زامپا بھی موجود ہوں گے۔

مسلسل انجری اور کووڈ مسائل کو دیکھتے ہوئے آسٹریلین ٹیم نے اسکواڈ کی مدد کے لیے بلے باز میٹ رینشا کو لاہور روانہ کردیا ہے البتہ ٹیم کو جوائن کرنے سے قبل انہیں تین دن آئسولیشن میں رہنا ہوگا۔

مزید پڑھیں: انجری کے سبب اسمتھ پاکستان کےخلاف ون ڈے اور ٹی20 سیریز سے باہر

ایگار نے حال ہی میں سری لنکا کے خلاف ٹی20 میچ میں سری لنکا کی نمائندگی کی تھی اور 15.66 کی اوسط سے تین وکٹیں حاصل کی تھیں۔

پاکستان اور آسٹریلیا کے درمیان پہلا ون ڈے میچ آج لاہور میں کھیلا جائے گا۔

ضرور پڑھیں

تبصرے (0) بند ہیں