ہم ایوارڈز کی ٹکٹ کے پیسے سیلاب متاثرین میں عطیہ کرنے کا اعلان

12 ستمبر 2022
ہم ایوارڈز رواں ماہ کے اختتام پر کینیڈا میں ہوں گے—فوٹو: انسٹاگرام
ہم ایوارڈز رواں ماہ کے اختتام پر کینیڈا میں ہوں گے—فوٹو: انسٹاگرام

رواں ماہ کے اختتام میں ہونے والے ہم ٹی وی ایوارڈز کی ٹکٹ سے حاصل ہونے والی رقم کے ایک حصے کو سیلاب متاثرین میں عطیہ کرنے کا اعلان کردیا گیا۔

ہم ٹی وی نیٹ ورک کی جانب سے سیلاب متاثرین کے لیے کی گئی ٹیلی تھون میں سلطانہ صدیقی، درید اور مومنا درید سمیت دیگر اعلیٰ عہدیداروں نے شرکت کی، جہاں انہوں نے ٹی وی ایوارڈز کی رقم کے ایک حصے کو متاثرین کی مدد کے لیے عطیہ کرنے کا اعلان کیا۔

ٹیلی تھون کی میزبان احسن خان اور جگن کاظم نے کی جب کہ بشریٰ انصاری سمیت کئی معروف شوبز شخصیات اس کا حصہ بنیں اور لوگوں نے ٹیلی فون کرکے متاثرین کی مدد کے لیے رقم کا اعلان کیا۔

ٹیلی تھون کے دوران ہی ہم ٹی وی نیٹ ورک کے اعلیٰ عہدیداروں نے اعلان کیا کہ رواں ماہ 24 ستمبر کو کینیڈا میں ہونے والے ایوارڈز کی ٹکٹ سے حاصل ہونے والی کمائی کا ایک حصہ سیلاب متاثرین کے لیے عطیہ کیا جائے گا۔

انتظامیہ کی جانب سے اس بات کی وضاحت نہیں کی گئی کہ ٹکٹ سے حاصل ہونے والی رقم کا کتنا حصہ متاثرین کی مدد کے لیے استعمال کیا جائے گا۔

علاوہ ازیں ٹیلی تھون کے دوران یہ بھی بتایا گیا کہ ہم ٹی وی نیٹ ورک کے ملازمین نے اپنی ایک دن کی تنخواہ سیلاب متاثرین کے لیے عطیہ کی ہے، جس پر انتطامیہ ملازمین کی مشکور ہے۔

ٹیلی تھون کے دوران ہم ٹی وی نیٹ ورک کے چیف ایگزیکٹو افسر (سی ای او) درید قریشی نے بتایا کہ کینیڈا میں ایوارڈز شو کے درمیان بھی سیلاب متاثرین کے لیے امداد جمع کی جائے گی اور پلیٹ فارم کو متاثرین کے لیے استعمال کیا جائے گا۔

انہوں نے بتایا کہ پہلے ہی نیٹ ورک نے ہمدرد کے نام سے متاثرین کی مدد کے لیے مہم شروع کردی ہے، جس کے تحت ملک بھر میں امدادی سامان بھجوایا جا چکا ہے۔

ضرور پڑھیں

تبصرے (0) بند ہیں