بولی وڈ فلموں کے ’کمشنر‘ وکرم گوکھلے چل بسے

اپ ڈیٹ 28 نومبر 2022
<p>وکرم گوکھلے نے متعدد فلموں میں پولیس افسر اور کمشنرز کے کردار ادا کیے—اسکرین شاٹ</p>

وکرم گوکھلے نے متعدد فلموں میں پولیس افسر اور کمشنرز کے کردار ادا کیے—اسکرین شاٹ

متعدد بولی وڈ فلموں میں پولیس کمشنر یا سیکیورٹی و سائنس اداروں کے سربراہ کا کردار ادا کرنے والے سینیئر اداکار وکرم گوکھلے 77 برس کی عمر میں کچھ عرصہ علیل رہنے کے بعد 26 نومبر کو چل بسے۔

وکرم گوکھلے کا تعلق فلمی خاندان سے تھا، ان کی پڑدادی کو متحدہ ہندوستان کی پہلی اداکارہ قرار دیا جاتا ہے جب کہ ان کی دادی نے بھی بھارتی فلموں کے اغاز میں چائلڈ آرٹسٹ کے طور پر کام کیا۔

وکرم گوکھلے کے والد چندر کانت گوکھلے بھی اداکار تھے اور انہوں نے زیادہ تر مراٹھی زبان کی فلموں میں کام کیا۔

وکرم گوکھلے تقسیم ہند سے قبل بمبئی ریزیڈنسی کے شہر پونا میں 1945 میں پیدا ہوئے تھے اور انہوں نے جوانی میں ہی کیریئر کا آغاز کیا تھا۔

وکرم گوکھل نے کیریئر کا آغاز اسٹیج اور تھیٹر ڈراموں سے کیا، بعد ازاں انہوں نے ٹیلی وژن اور پھر بڑے پردے کا رخ کیا اور انہوں نے بولی وڈ میں 1970 میں ڈیبیو کیا۔

انہوں نے درجنوں مراٹھی فلموں میں بھی کام کیا اور انہیں کئی مراٹھی فلموں کی ہدایات بھی دیں اور انہیں پروڈیوس بھی کیا۔

وکرم گوکھلے نے امیتابھ بچن سے لے کر اکشے کمار، اجے دیوگن، سلمان خان، شاہ رخ خان، سنجے دت اور 2000 کے بعد آنے والے اداکاروں کے ساتھ بھی کام کیا۔

انہوں نے متعدد بولی وڈ فلموں میں پولیس کمشنر، اعلیٰ پولیس افسر، فوج اور دیگر سیکیورٹی اور حساس اداروں کے سربراہ یا اہم عہدیدار کے علاوہ سائنسی اداروں کے ڈائریکٹرز کے کردار ادا کیے۔

انہیں بولی وڈ فلموں کے ’کمشنر‘ اور ’ڈائریکٹر‘ کے طور پر بھی جانا جاتا ہے اور انہوں نے متعدد فلموں میں ایشوریا رائے سمیت دیگر ہیروئنز اور سپر ہیروز کے والد کا کردار بھی ادا کیا۔

انہوں نے چند سال قبل گلے میں خرابی اور بیماری کے باعث اسٹیج اداکاری سے ریٹائرمنٹ لے لی تھی مگر اس باوجود وہ فلموں میں دکھائی دیے تھے۔

’انڈین ایکسپریس‘ کے مطابق وکرم گوکھللے گزشتہ کچھ عرصے سے علیل تھے اور انہیں ممبئی کے نجی ہسپتال میں داخل کرایا گیا تھا، جہاں وہ ایک ماہ سے زیادہ عرصے سے زیر علاج تھے۔

رپورٹ کے مطابق سینیئر اداکار کی طبیعت ایک ہفتہ قبل انتہائی علیل ہوگئی تھی اور وہ 26 نومبر کو خالق حقیقی سے جا ملے۔

رپورٹ میں بتایا گیا کہ وکرم گوکھلے کی موت پر شوبز شخصیات نے گہرے دکھ اور افسوس کا اظہار کرتے ہوئے ان کی موت کو بولی وڈ کے لیے بڑا نقصان قرار دیا۔

ضرور پڑھیں

تبصرے (0) بند ہیں