فواد چوہدری کو کل اسلام آباد ہائیکورٹ میں پیش کرنے کا حکم
عدالت نے اسلام آباد پولیس کو فواد چوہدری کو کل اسلام آباد ہائیکورٹ میں پیش کرنے کا حکم دے دیا۔
اسلام آباد ہائیکورٹ میں فواد چوہدری کی نظر بندی کے خلاف کیس کی سماعت جسٹس میاں گل حسن اورنگزیب نے کی۔
فواد چوہدری کے وکیل فیصل چوہدری عدالت میں پیش ہوئے، فواد چوہدری کی اہلیہ حبہ چوہدری عدالت میں پیش ہوئیں۔
وکیل فیصل چوہدری نے دلائل دیے کہ فواد چوہدری کو اسلام آباد ہائی کورٹ نے حفاظتی ضمانت دی تھی، عدالت نے فواد چوہدری کی گرفتاری سے روکا تھا۔
وکیل نے مزید کہا کہ فواد چوہدری کو 3 ایم پی او کے تحت نظر بند کیا گیا ہے، جس پر جسٹس میاں گل حسن اورنگزیب نے کہا کہ آپ کی درخواست ابھی فکس نہیں ہے۔
وکیل فیصل چوہدری نے کہا کہ آئی جی اسلام آباد عدالت میں تھے اور عدالت نے کہا تھا ان کو کہ فواد چوہدری کو گرفتار نہ کریں، 10 مئی کو فواد چوہدری کو گرفتار کیا گیا اور وہ پورا دن سپریم کورٹ میں موجود رہے۔
عدالت نے فریقین کو نوٹسز جاری کرتے ہوئے کل تک جواب طلب کر لیا اور اسلام آباد پولیس کو فواد چوہدری کو کل اسلام آباد ہائیکورٹ میں پیش کرنے کا حکم دے دیا۔
لائیو ٹی وی