پنجاب اسمبلی میں آج خفیہ رائے شماری کے ذریعے نو منتخب ارکان اسپیکر اور ڈپٹی اسپیکر کا انتخاب کریں گے۔

ڈان نیوز کے مطابق ایوان میں اکثریت رکھنے والی پاکستان مسلم لیگ (ن) کا دعویٰ ہے کہ پارٹی کی جانب سے ملک احمد خان کو اسپیکر پنجاب اسمبلی بنائے جانے کا امکان ہے جب کہ وزیراعلیٰ کا انتخاب اگلہ مرحلہ ہوگا۔

ملک محمد احمد خان کا مقابلہ سنی اتحاد کونسل کے احمد خان بھچر سے ہوگا۔

اسپیکر کے انتخاب کے بعد موجودہ اسپیکر سبطین خان نئے منتخب ہونے والے اسپیکر سے حلف لیکر ایوان سے رخصت ہوجائیں گے۔

نئے منتخب ہونے والے اسپیکر ایوان کے ڈپٹی اسپیکر کا الیکشن منعقد کرائیں گے

ڈپٹی اسپیکر کے منصب کے لیے ن لیگ اور ان کی اتحادی جماعتوں نے ظہیر اقبال چنڑ کو نامزد کیا ہے جبکہ سنی اتحاد کونسل کی جانب سے معین الدین ریاض قریشی کو نامزد کیا گیا ہے۔

پنجاب اسمبلی کے 371 ممبران کے ایوان میں 313 نو منتخب اراکین نے حلف اٹھا لیا ہے۔

حلف اٹھانے والوں میں ن ليگ کے 201، پیپلز پارٹی کے 14، مسلم لیگ ق کے 10 اور آئی پی پی کے 6 اراکین شامل ہیں۔

اسپیکر اور ڈپٹی اسپیکر کا انتخاب خفیہ رائے شماری کے ذریعے عمل میں لایا جائے گا، اگلے مرحلے میں پنجاب کے وزیراعلی کے الیکشن کا شیڈول جاری کردیا جائے گا