پی ٹی آئی انتشار پھیلانے کیلئے کسی بھی حد تک جاسکتی ہے، عظمیٰ بخاری
وزیر اطلاعات پنجاب عظمی بخاری نے کہا ہے کہ فتنہ پارٹی انتشار پھیلانے کیلئے کسی بھی حد تک جاسکتی ہے، اس وقت بھابھی اور نند میں پارٹی پر قبضے کی جنگ چل رہی ہے۔
ڈان نیوز کے مطابق وزیر اطلاعات پنجاب عظمی بخاری نے پاکستان تحریک انصاف (پی ٹی آئی) کے بانی چیئرمین عمران خان کی بہن علیمہ خان اور روف حسن کی چیٹ پر ردعمل دیتے ہوئے کہا کہ مذہب کارڈ، غداری کارڈ کے بعد پیش خدمت ہے مظلومیت کارڈ۔
انہوں نے کہا کہ بھابھی اور نند کے اختلافات فتنہ پارٹی کے واٹس ایپ گروپس میں موضوع بحث بن رہے ہیں، بھابھی اور نند میں پارٹی پر قبضے کی جنگ چل رہی ہے۔
عظمیٰ بخاری نے کہا کہ فتنہ پارٹی ملک میں انتشار پھیلانے کے لیے کسی بھی حد تک جا سکتی ہے، عمران خان اور اور بشری بی بی کے پروپیگنڈوں سے اب کچھ بھی چیز بعید نہیں۔
ان کا کہنا تھا کہ عمران خان ایک ہفتے مولا جٹ بنتے اگلے ہفتے ’معصوم پرندہ‘ بن جاتے ہیں، وہ جیل سے نکلنے کے لیے کبھی فوج سے معافیاں کبھی برطانوی وزیراعظم سے اپیلیں کر رہے ہیں۔
صوبائی وزیر اطلاعات نے کہا کہ بانی پی ٹی آئی جب وزیراعظم تھے مخالفین کو پھانسی پر لٹکانے کی فہرستیں تیار کرتے تھے، آج ان کی اپنی بیوی اور بہن پھانسی سے متعلق پراپیگنڈہ کر رہی ہیں۔
انہوں نے کہا کہ عمران خان اقتدار میں تھے تو مخالفین کو دیوار میں چنوا دینے کے پلان بناتے رہے، اور آج دونوں میاں بیوی جیل کی دیواروں کے سائے سے بھی ڈرنے لگے ہیں۔
اس سے قبل وفاقی وزیر اطلاعات عطا تارڑ نے کہا تھا کہ آج عمران خان کی بہن علیمہ خان کی ترجمان پی ٹی آئی روف حسن کےساتھ ہونے والی گفتگو سامنے آئی۔
وفاقی وزیر نے کہا کہ بشریٰ بی بی ہمدردی کے لیے جھوٹا اور من گھڑت بیانیہ پھیلارہی ہیں، تحریک انتشار میں کئی سال سے ڈس انفارمیشن سیل چل رہے ہیں، نفرت کی سیاست کا انجام اچھا نہیں ہوتا، بشریٰ بی بی جو جھوٹا بیانیہ پھیلارہی ہیں اس میں کوئی حقیقت نہیں۔
لائیو ٹی وی