’جو بچے ہیں سنگ سمیٹ لو‘ جون میں ریلیز کیے جانے کا امکان
پاکستان کی پہلی اوریجنل سیریز ’جو بچے ہیں سنگ سمیٹ لو‘ کو اسٹریمنگ ویب سائٹ نیٹ فلیکس پر رواں برس جون میں ریلیز کیے جانے کا امکان ہے۔
’جو بچے ہیں سنگ سمیٹ لو‘ کی شوٹنگ کئی ماہ سے جاری ہے اور ابھی تک نیٹ فلیکس نے اس کے حوالے سے کوئی واضح اعلان نہیں کیا، تاہم لکھاری فرحت اشتیاق نے عندیہ دیا ہے کہ سیریز کو جون میں ریلیز کیے جانے کا امکان ہے۔
شوبز میگزین کی رپورٹ کے مطابق فرحت اشتیاق نے حال ہی میں اپنے یوٹیوب چینل پر کمنٹ کرنے والے مداح کو بتایا کہ ان کے ناول پر بنائی جانے والی سیریز کو جون میں ریلیز کیا جائے گا۔
فرحت اشتیاق نے واضح نہیں کیا کہ ’جو بچے ہیں سنگ سمیٹ لو‘ کو جون 2025 میں نشر کیا جائے گا یا پھر 2026 میں کیا جائے گا؟
’جو بچے ہیں سنگ سمیٹ لو‘ سیریز کی کہانی فرحت اشتیاق کے اسی نام سے شائع ہونے والے ناول سے لی گئی ہے، تاہم یہ واضح نہیں ہے کہ سیریز کی ڈرامائی تشکیل بھی انہوں نے خود ہی دی ہے یا کسی اور نے اسکرپٹ لکھا ہے؟
نیٹ فلیکس کی جانب سے پاکستان کی پہلی نیٹ فلیکس سیریز ’جو بچے ہیں سنگ سمیٹ لو‘ کو بنانے کی تصدیق اگست 2023 میں کی گئی تھی۔
’جو بچے ہیں سنگ سمیٹ لو‘ ناول کی کہانی سکندر نامی ایک ایسے نوجوان کے گرد گھومتی ہے جو معروف ہارورڈ یونیورسٹی میں قانون کا طالب علم ہوتا ہے مگر اس کی زندگی میں کئی منفرد موڑ آتے ہیں اور ان کی زندگی میں اس وقت نیا موڑ آتا ہے جب یورپی ملک اٹلی میں ان کی ملاقات لیزا نامی ایک آرٹسٹ سے ہوتی ہے، جن کا ماضی انتہائی درد ناک ہوتا ہے۔
ویب سیریز میں ماہرہ خان، فواد خان، احد رضا میر، صنم سعید، حمزہ علی عباسی، بلال اشرف، مایا علی، ہانیہ عامر، خوشحال خان، نادیہ جمیل، عمیر رانا، اقرا عزیز اور ثمینہ احمد کو کاسٹ کرنے کی خبریں ہیں۔
یہ واضح نہیں ہے کہ ویب سیریز میں سکندر اور اس کی محبوبہ کا کردار ادا کون کرے گا۔
لائیو ٹی وی