ڈی جی آئی ایس پی آر لیفٹننٹ جنرل احمد شریف چوہدری نے کہا ہے کہ بھارت نے پاکستان میں 3 ایئربیسز پر میزائل داغے جسے ایئرڈیفنس سسٹم نے ناکارہ بنادیا اور پاک فضائیہ کے تمام اثاثے محفوظ ہیں۔

ترجمان پاک فوج لیفٹیننٹ جنرل احمد شریف نے رات گئے مختصر پریس بریفنگ میں بتایا کہ اب سے کچھ دیر پہلے بھارت کی جانب سے آدم پور سے 6 بیلسٹک میزائل فائر کیے گئے ہیں جن میں سے ایک میزائل آدم پور میں ہی گرگیا اور 5 امرتسر میں گرے ہیں۔

ڈی جی آئی ایس پی آر نے کہا کہ بھارت اپنی ہی آبادی کو بیلسٹک میزائلوں سے نشانہ بنارہا ہے اور بھارتی پنجاب میں سکھوں کی آبادی کو نشانہ بنارہا ہے۔

ان کا کہنا تھا کہ ہماری ہمدردیاں بھارت کی اندرونی سازش کا شکار اقلیتوں کے ساتھ ہیں، بھارت بدحواسی میں اپنے ہی شہریوں کو نشانہ بنارہی ہے۔

انہوں نے مزید کہا کہ ہم ہرقسم کی دہشت گردی کی مذمت کرتے ہیں۔

سیکیورٹی ذرائع نے بتایا ہے کہ بھارت اپنے ہی لوگوں پر میزائل فائل کرکے مزید جارحیت کا جواز چاہتا ہے اور وہ دنیا کو یہ جھوٹ بیچنا چاہتا ہے کہ پاکستان میزائل فائر کررہا ہے۔

ذرائع کا کہنا تھا کہ پاکستان کے پاس اپنے دعوے کا الیکٹرونک ثبوت موجود ہے، بھارت سکھوں کو نشانہ بناکر پاکستان کے خلاف نفرت پیدا کرنا چاہتا ہے جب کہ بھارت نے 7 اور 8 مئی کی رات بھی امر تسر پر 3 میزائل فائر کیے تھے۔

بھارت نے پاک فضائیہ کے بیسز پر میزائل داغے ہیں

بعد ازاں، کچھ دیر بعد ترجمان پاک فوج ایک بار پھر بریفنگ کے لیے آئے اور بتایا کہ بھارت نے اب سے کچھ دیر قبل اپنے طیاروں سے فضا سے زمین پر میزائل داغے ہیں، نور خان بیس، مرید بیس اور شورکوٹ کو نشانہ بنایا گیا ہے۔

ان کا کہنا تھا کہ اب تک کے اطلاعات کے مطابق ایئرفورس کے تمام طیارے اور اثاثے محفوظ ہیں۔

لیفٹننٹ جنرل احمد شریف چوہدری نے کہا کہ بھارت نے افغانستان میں بھی میزائل داغے ہیں اور ڈرونز کا حملہ بھی افغانستان پر کیا ہے، بھارت اپنے پاگل پن اور جارحیت اور مکاری کے ذریعے پورے خطے کو ایک خطرناک جنگ کی طرف دھکیل رہا ہے۔

ان کا مزید کہنا تھا کہ ہم صرف یہ کہنا چاہتے ہیں، ہم تمہاری طاقت، تمہاری مکاری اور جارحیت سے مرعوب ہونے والی قوم نہیں ہیں، اب تم صرف ہمارے جواب کا انتظار کرو۔

’ایئرڈیفنس سسٹم نے بھارت کے میزائل حملوں کو ناکام بنایا‘

ڈی جی آئی ایس پی آر نے کہا کہ بھارت کی جانب سے پی ایف ایئر بیسز پر داغے گئے میزائلوں کو ایئر ڈیفنس سسٹم نے ناکام بنایا جب کہ پاکستان کے پاس میزائل حملوں کے الیکٹرونک شواہد موجود ہیں کہ یہ میزائل کہاں سے داغے گئے۔

ان کا کہنا تھا کہ افغانستان پر جو میزائل حملے اور ڈرون حملے کیے گئے تھے، ان کی لانچ بھارت نے انڈین پنجاب کے حملوں کے فوراً بعد کیے جس سے معلوم ہوتا ہے کہ بھارت کا کوئی بڑا منصوبہ ہے تاکہ خطے میں عدم توازن پیدا کیا جائے اور خطے کو جنگ کی طرف دھکیلا جائے۔

لیفٹننٹ جنرل احمد شریف چوہدری نے کہا کہ ہندوستان کی بڑھتی ہوئی جارحیت اور ہر بزدلانہ حملے کو ناکام بنایا جارہا ہے اور یہ حملے قطعاً پاکستانی عوام کے حوصلوں کو پست نہیں کرسکتے، بجائے اس کے کہ یہ حوصلے کم ہو، یہ بھارتی جارحیت کے ساتھ مزید بڑھ رہے ہیں۔

ان کا مزید کہنا تھا کہ پاکستان کے بہادر اور غیور عوام کے حوصلے دیکھنے ہوں تو اس وقت راولپنڈی میں دیکھیں کہ کس طرح عوام بڑی تعداد میں پاک فوج کی حمایت میں سڑکوں پر نکل آئی ہے، پاک فوج ہمہ وقت وطن کے دفاع کے لیے تیار ہے۔

پاکستان نے جوابی کارروائی کا آغاز کردیا

سیکیورٹی ذرائع نے بتایا ہے کہ پاکستان نے بھارتی جارحیت پر جوابی کارروائی کا آغاز کردیا ہے، بھارت میں متعدد اہداف کو نشانہ بنایا گیا ہے۔

پاکستانی قوم کا مورال بلند ہے، وفاقی وزیر اطلاعات

وزیراطلاعات عطا تارڑ نے کہا ہے کہ بھارتی میزائلوں کو فضا میں ہی تباہ کردیا گیا اور پاک فضائیہ کے اثاثے محفوظ ہیں، ایئرڈیفنس سسٹم نے میزائل حملوں کو کامیابی سے ناکام بنایا اور قوم کا مورال بلند ہے۔

اس سے قبل، ڈی جی آئی ایس پی آر لیفٹننٹ جنرل احمد شریف نے پریس کانفرنس کے دوران واضح کیا تھا کہ اگر بھارت کو اتنی ہی خواہش ہے کہ پاکستان اس پر حملہ کرے تو بے فکر رہیں ہم اس کی یہ خواہش ضرور پوری کریں گے، اور اپنے وقت اور اپنی مرضی کے مطابق جواب دیں گے۔