غزہ میں امدادی مراکز پر اسرائیل کے وحشیانہ حملوں میں 549 فلسطینی شہید ہوچکے
غزہ میں امریکی اور اسرائیلی امدادی مراکز کے قریب امداد حاصل کرنے کی کوشش میں اسرائیل کے وحشیانہ حملوں میں اب تک کم از کم 549 فلسطینی شہید ہوچکے ہیں، جبکہ آج اسرائیلی فائرنگ سے شہادتوں کی تعداد 56 ہو گئی ہے۔
قطری نشریاتی ادارے الجزیرہ کی رپورٹ کے مطابق، غزہ کی حکومت کے میڈیا دفتر نے بتایا ہے کہ امریکی اور اسرائیلی حمایت یافتہ غزہ ہیومینیٹیرین فاؤنڈیشن (جی ایچ ایف ) کے چار ہفتے قبل کام شروع کرنے کے بعد سے اب تک کم از کم 549 فلسطینی امداد حاصل کرنے کی کوشش کے دوران شہید ہو چکے ہیں۔
غزہ کی حکومتی اتھارٹی کے جاری کردہ بیان کے مطابق، امدادی مراکز پر امداد کے حصول کے منتظر فلسطینیوں پر ہونے والے حملوں کے نتیجے میں 4066 افراد زخمی اور 39 افراد لاپتا ہو چکے ہیں۔
بیان میں مزید کہا گیا کہ ’ ان نام نہاد ’ امدادی مراکز’ پر جو کچھ ہو رہا ہے، وہ مکمل طور پر جنگی جرم ہے، جس کی براہ راست اور بنیادی ذمہ داری اسرائیلی قابض قوت پر عائد ہوتی ہے۔’
بیان میں کہا گیا کہ’ ہم اس جاری جرم کی شدید مذمت کرتے ہیں، جہاں بھوکے شہریوں کو جان بوجھ کر امداد کے نام پر بلایا جاتا ہے اور پھر منظم اور منصوبہ بند طریقے سے انہیں روزانہ کی بنیاد پر گولیوں کا نشانہ بنایا جاتا ہے۔’
مزید کہا گیاکہ ’ قابض اسرائیلی ریاست خوراک کو اجتماعی قتل کے ہتھیار کے طور پر استعمال کر رہی ہے، اور جسے وہ ’امداد‘ قرار دے رہی ہے، اسے تباہی اور غلبے کا ذریعہ بنا دیا گیا ہے۔’
بچوں کی فلاح کے لیے کام کرنےو الی عالمی تنظیم ’ سیو دی چلڈرن ’ کا کہنا ہے کہ امریکی و اسرائیلی حمایت یافتہ غزہ ہیومینیٹیرین فاؤنڈیشن ( جی ایچ ایگ) کے چار ہفتے قبل کام شروع کرنے کے بعد سے غزہ میں خوراک کی تقسیم کے مراکز پر ہونے والے حملوں میں نصف سے زیادہ واقعات میں بچے شہید یا زخمی ہوئے ہیں۔
ادارے نے بتایا کہ 19 جان لیوا حملوں میں سے 10 حملوں میں بچے متاثرین میں شامل تھے۔
سیو دی چلڈرن کے بیان میں کہا گیا کہ ’ غزہ میں کچھ خاندان اس قدر مایوس ہو چکے ہیں کہ وہ بچوں کو خوراک حاصل کرنے کے لیے بھیج رہے ہیں، جہاں وہ اسرائیلی فوج کی گولیوں کا نشانہ بننے کے خطرے میں آ جاتے ہیں۔’
ادارے نے مزید کہا کہ ’ 27 مئی کے بعد سے امدادی مراکز پر یا وہاں تک جانے کے راستوں پر اسرائیلی حملوں کے نتیجے میں 500 سے زائد فلسطینی شہید اور کم از کم 3000 زخمی ہو چکے ہیں، یہ اعداد و شمار اقوامِ متحدہ کے انسانی حقوق کے دفتر (او ایچ سی ایچ آر) کے مطابق ہیں۔’
سیو دی چلڈرن کے عملے نے ایسے مناظر بھی دیکھے ہیں جہاں لوگ امداد لینے کی کوشش میں شہید ہو گئے۔
سیو دی چلڈرن کے مشرق وسطیٰ، شمالی افریقہ اور مشرقی یورپ کے ریجنل ڈائریکٹر احمد الہنداوی نے کہا کہ ’ کوئی بھی ان مراکز سے امداد نہیں لینا چاہتا، یہ گویا موت کا پروانہ ہے، لوگ خوفزدہ ہیں کہ وہ مارے جائیں گے، آج ہمارے ایک ساتھی نے بتایا کہ اگرچہ ان کے خاندان کے پاس صرف ایک وقت کا کھانا رہ گیا ہے، پھر بھی وہ جی ایچ ایف کے مرکز نہیں جائیں گے، کیونکہ ان کی نظر میں ان کی جان آٹے کے تھیلے سے زیادہ قیمتی ہے۔’
دوسری جانب اے ایف پی غزہ کے ریسکیو اہلکاروں کے حوالے سے رپورٹ کیا ہے کہ آج اسرائیلی فائرنگ سے ہونے والی شہادتوں کی تعداد 56 ہو گئی ہے۔
غزہ کی سول ڈیفنس ایجنسی نے کہا ہے کہ اسرائیلی افواج کی فائرنگ سے جنگ زدہ فلسطینی علاقے میں شہید ہونے والوں کی تعداد 56 ہو گئی ہے ۔
سول ڈیفنس کے ترجمان محمود بَسَّال نے اے ایف پی کو بتایا کہ غزہ بھر میں اسرائیلی فائرنگ سے 56 افراد شہید ہوئے، جن میں سے6 افراد وہ تھے جو دو مختلف مقامات پر امداد کے انتظار میں تھے۔
لائیو ٹی وی