امریکی صدر ڈونلڈ ٹرمپ نے روس سے کہا ہے کہ وہ یوکرین جنگ 50 دن کے اندر ختم کرے ورنہ اسے بڑے پیمانے پر نئی اقتصادی پابندیوں کا سامنا کرنا پڑے گا، ٹرمپ نے کیف کے لیے نئے ہتھیاروں کی فراہمی کے منصوبوں کا بھی اعلان کیا ہے۔

العریبیہ کی رپورٹ کے مطابق وائٹ ہاؤس میں نیٹو کے سربراہ مارک روٹے کے ساتھ ملاقات کے دوران ٹرمپ نے صحافیوں کو بتایا کہ’ ہم روس سے بہت زیادہ ناخوش ہیں۔’

امریکی صدر کا کہنا تھا کہ ’ اگر 50 دنوں میں کوئی معاہدہ نہیں ہوتا تو ہم بہت سخت ٹیرف لگائیں گے، تقریباً 100 فیصد ٹیرف۔’ انہوں نے مزید کہا کہ یہ ’ ثانوی ٹیرف’ ہوں گے جن کا نشانہ روس کے باقی ماندہ تجارتی شراکت دار ہوں گے، اس طرح ماسکو کی پہلے سے عائد مغربی پابندیوں کے باوجود بچنے کی صلاحیت کو مفلوج کرنے کی کوشش کی جائے گی۔

یوکرین کو ہتھیاروں کی فراہمی کا نیا معاہدہ

ٹرمپ اور مارک روٹے نے ایک معاہدے کا بھی تذکرہ کیا، جس کے تحت نیٹو فوجی اتحاد امریکا سے ہتھیار خریدے گا، جس میں پیٹریاٹ اینٹی میزائل بیٹریاں بھی شامل ہیں، اور پھر انہیں یوکرین کو فراہم کرے گا تاکہ وہ روس کے حملے کا مقابلہ کر سکے۔

ٹرمپ نے کہا کہ ’ یہ اربوں ڈالر مالیت کا فوجی سازوسامان امریکا سے خریدا جائے گا اور نیٹو کو دیا جائے گا… اور یہ تیزی سے میدان جنگ میں تقسیم کیا جائے گا۔’

نیدر لینڈز کے سابق وزیر اعظم مارک روٹے نے کہا کہ اس معاہدے کے تحت یوکرین کو ’ بڑے پیمانے پر’ ہتھیار ملیں گے۔

ٹرمپ کا پیوٹن سے بڑھتا ہوا غصہ

جنوری میں اپنی دوسری مدت صدارت کا آغاز کرنے کے فوراً بعد، ٹرمپ نے پیوٹن کے ساتھ تعلقات بہتر بنانے کی کوشش شروع کی تھی، کیونکہ انہوں نے اپنی انتخابی مہم کے اس وعدے کو پورا کرنے کی کوشش کی تھی کہ یوکرین جنگ کو 24 گھنٹوں میں ختم کر دیں گے۔

پیوٹن کی طرف ان کے اس جھکاؤ نے کیف میں خدشات پیدا کردیے تھے، ان خدشات کو فروری میں اس وقت تقویت ملی تھی، جب اوول آفس میں ٹرمپ اور ان کی ٹیم نے یوکرین کے صدر ولادیمیر زیلنسکی کی سرزنش کی تھی۔

لیکن ٹرمپ نے حالیہ ہفتوں میں پیوٹن پر بڑھتے ہوئے غصے اور مایوسی کا اظہار کیا، کیونکہ روسی رہنما نے تین سالہ جاری جنگ کو ختم کرنےکے بجائے یوکرین حملے تیز کردیے ہیں۔

ٹرمپ نے پیر کو پیوٹ کے بارے میں مزید کہا کہ’ میں یہ نہیں کہنا چاہتا کہ وہ قاتل ہے، لیکن وہ ایک سخت آدمی ہے۔’

پچھلے ہفتے، ٹرمپ نے پیر کو روس کے بارے میں ایک اعلان کا اشارہ دیا تھا، پھر انہوں نے اتوار کو اعلان کیا کہ وہ یوکرین کو اہم پیٹریاٹ فضائی دفاعی نظام بھیجیں گے تاکہ اسے روسی حملوں کی بڑھتی ہوئی شدت سے بچنے میں مدد مل سکے۔

واشنگٹن نے بھی اس ماہ کے اوائل میں کیے گئے اس اعلان سے یو ٹرن لے لیا ہے جس میں کہا گیا تھا کہ وہ کیف کو کچھ ہتھیاروں کی ترسیل روک دے گا۔

مارک روٹے کا وائٹ ہاؤس کا دورہ نیدرلینڈز کے سابق وزیر اعظم کے جون میں دی ہیگ میں نیٹو سربراہی اجلاس میں ٹرمپ کو ’ ڈیڈی’ کہنے کے بعد پہلا دورہ ہے۔

یوکرین کی صورتحال اور نئی پیشرفتیں

اقوام متحدہ کے اعداد و شمار کے مطابق، ماسکو نے گزشتہ چند ہفتوں میں بڑی تعداد میں ڈرون اور میزائل حملے کیے تھے، جن کے دوران ہلاک یا زخمی ہونے والے یوکرینی شہریوں کی تعداد تین سال کی بلند ترین سطح پر پہنچ گئی ہے۔

امریکی صدر کی جانب سے روس کے لیے یہ الٹی میٹم اس وقت سامنے آیا ہے جب ان کے خصوصی ایلچی کیتھ کیلگ یوکرینی صدر ولادیمیر زیلنسکی سے ملاقات کے لیے کیف پہنچے ہیں۔

ولادیمیر زیلنسکی نے ’ نتیجہ خیز ملاقات’ کے بعد کہا کہ انہوں نے ’ یوکرین کے فضائی دفاع کو مضبوط بنانے، مشترکہ پیداوار، اور یورپ کے تعاون سے دفاعی ہتھیاروں کی خریداری’ پر تبادلہ خیال کیا۔

یوکرینی صدر نے یہ بھی کہا کہ وہ ’ صدر ٹرمپ کی حمایت اور دونوں ممالک کے لیے مثبت فیصلوں کے لیے شکر گزار ہیں۔’

دریں اثنا، روسی افواج نے پیر کو کہا کہ انہوں نے مشرقی یوکرین میں دو گاؤں، ایک ڈونیٹسک ریجن میں اور دوسرا زاپوریزیا ریجن میں، پر قبضہ کر کے نئی علاقائی کامیابی حاصل کی ہے۔

یوکرین کے علاقائی حکام نے اعلان کیا کہ ان کی افواج نے پیر کو مشرقی خارکیف اور سومی ریجنز میں کم از کم تین شہریوں کو بھی ہلاک کیا۔