عمارہ چوہدری نے کراچی میں تنہا رہنے کے وقت کا خوفناک واقعہ بتا دیا
اداکارہ عمارہ چوہدری نے انکشاف کیا ہے کہ وہ بھی کام کے سلسلے میں کراچی میں تنہا رہتی رہی ہیں، کورونا کے دنوں میں ایک بار وہ پورا دن بیہوش رہیں، ان کے گھر والے پریشان ہوگئے۔
عمارہ چوہدری نے حال ہی میں سماء ٹی وی کے مارننگ شو میں شرکت کی، جہاں انہوں نے کراچی میں تنہا رہنے کے دوران پیش آنے والی مشکلات سے متعلق بھی بات کی۔
اداکارہ نے بتایا کہ تنہا رہنے کے کچھ فوائد بھی ہیں لیکن اس کے مقابلے نقصانات زیادہ ہیں، خصوصی طور پر اپنے اہل خانہ اور قریبی رشتے داروں سے دوری کا پچھتاوا ہوتا ہے۔
ان کے مطابق تنہا رہنے سے اگرچہ انسان بہت کچھ سیکھتا ہے، بہت سارے کام خود کرنے لگتا ہے، مشکل وقت کا سامنا کرنے کی ہمت آجاتی ہے لیکن اس باوجود اکیلے رہنے کے نقصانات زیادہ ہیں۔
عمارہ چوہدری نے بتایا کہ اداکاری اور کام کی وجہ سے وہ بھی لاہور سے کراچی منتقل ہوئیں اور ان کے لیے بھی یہ فیصلہ آسان نہ تھا۔
ان کا کہنا تھا کہ وہ کافی عرصے تک کراچی میں تنہا رہتی رہیں، اس دوران انہیں مشکلات بھی پیش آئیں۔
اداکارہ کے مطابق وہ ہر وقت اہل خانہ سے باتیں کرنے کی عادی رہی ہیں، اس لیے جب کراچی منتقل ہوئیں تو انہیں مشکلات پیش آئیں۔
عمارہ چوہدری کا کہنا تھا کہ خصوصی طور پر تنہا رہنے والے شخص کے لیے اس وقت مشکلات بڑھ جاتی ہیں جب وہ بیمار ہوتا ہے۔
انہوں نے بتایا کہ دو سال قبل انہیں تنہا رہنے کے دوران کورونا ہوا، ان کی طبیعت انتہائی خراب ہوئی اور اسی دوران ہی ان کے ساتھ خطرناک واقعہ پیش آیا۔
ان کا کہنا تھا کہ کورونا کے پہلے دن تو پڑوسیوں نے ان کا خیال رکھا، انہیں جوس وغیرہ دیے اور ان کی طبیعت بھی زیادہ خراب نہ ہوئی لیکن اگلے دن وہ بہت زیادہ بیمار پڑ گئیں۔
عمارہ چوہدری نے بتایا کہ اگلے روز وہ پورا دن بیہوش رہیں، دوسرے دن کسی کے دروازہ کھٹکھٹانے پر وہ ہوش میں آئیں اور پریشان رہ گئیں۔
ان کے مطابق انہوں نے اپنا فون دیکھا، جس پر گھر والوں کے بہت ساری فون کالز لگی ہوئی تھیں، میسیجز آئے ہوئے تھے، یہاں تک کہ گھر والوں نے کراچی کے ٹکٹ تک کروالیے تھے۔
عمارہ چوہدری نے کہا کہ ان کے گھر والوں نے مالک مکان کا فون کیا، جنہوں نے عمارت میں مینٹینسس دیکھنے والے افراد کو بھیجا۔
اداکارہ کا کہنا تھا کہ انہوں نے اسی وقت ہی پڑوسیوں اور عمارت کے چوکیداروں کو کہا کہ اگر ایسی صورتحال ہو تو گھر آکر دیکھ لیا کریں، جس پر پڑوسیوں اور چوکیداروں کا کہنا تھاکہ انہیں لگا کہ شاید وہ لاہور چلی گئی ہیں، کیوں کہ اکثر وہ ایسے ہی بتائے بغیر آتی جاتی رہتی ہیں۔
لائیو ٹی وی