بہاولنگر: خاتون مریضہ کا آپریشن کرنے والے 2 جعلی ڈاکٹر گرفتار، نجی ہسپتال سیل
بہاولنگر میں حسین آباد چوک میں واقع نجی ہسپتال میں 3 روز قبل خاتون مریضہ کا آپریشن کرنے والے 2 جعلی ڈاکٹروں کو گرفتار کر لیا گیا۔
ڈان اخبار کی رپورٹ کے مطابق یہ فرسٹ انفارمیشن رپورٹ (ایف آئی آر) ڈپٹی ڈسٹرکٹ ہیلتھ آفیسر کی شکایت پر بی ڈویژن پولیس نے 24 جولائی کو درج کی تھی۔
ایف آئی آر کے مطابق محکمہ صحت کی ٹیم نے زبیدہ نائیک ہسپتال، حسین آباد چوک کا دورہ کیا، جہاں مختلف کمروں میں کئی مریض آپریشن کے بعد زیر علاج تھے، جن کا سی سیکشن ہوا تھا۔
ایف آئی آر کے مطابق ہسپتال میں کوئی مستند ڈاکٹر تعینات نہیں تھا، اسلم کے پاس بھی کوئی ڈگری یا لائسنس نہیں تھا، مقدمہ 5 افراد کے خلاف درج کیا گیا تھا، جن میں ہسپتال مالک اسلم بھی شامل ہے، جو موقع سے فرار ہو گیا، اب تک 2 ملزمان کو گرفتار کر لیا گیا ہے۔
محکمہ صحت کے ذرائع کے مطابق، غیر قانونی ہسپتال کو سیل کر دیا گیا ہے اور تمام مریضوں کو ریسکیو 1122 کے ذریعے ڈی ایچ کیو ہسپتال منتقل کر دیا گیا ہے۔
ذرائع کا کہنا ہے کہ یہ ہسپتال تقریباً 15 سال سے چل رہا تھا اور محکمہ صحت کی جانب سے کئی بار چھاپے مار کر سیل کیا گیا، مگر معمولی جرمانہ ادا کر کے دوبارہ کھول دیا جاتا تھا۔
ڈی ایچ کیو ہسپتال میں تعینات سینئر ہیلتھ افسر نے ’ڈان‘ کو بتایا کہ ضلع بھر بشمول بہاولنگر، منچن آباد، فورٹ عباس، چشتیاں اور ہارون آباد میں درجنوں نجی ہسپتال ایسے ہیں جہاں کوئی کوالیفائیڈ ڈاکٹر موجود نہیں۔
لائیو ٹی وی