یو اے ای میں پاکستانی سفارتی اور سرکاری پاسپورٹس کیلئے ویزا چھوٹ کا نفاذ کردیا گیا،اسحٰق ڈار
نائب وزیر اعظم اور وزیر خارجہ اسحٰق ڈار نے کہا ہے کہ یو اے ای کے تمام ہوائی اڈوں پر پاکستانی سفارتی اور سرکاری پاسپورٹس کے لیے ویزا چھوٹ کا نفاذ کردیا گیا ہے۔
نائب وزیراعظم اسحٰق ڈار نے اپنے ایکس اکاؤنٹ پر پوسٹ میں یو اے ای کے نائب وزیر اعظم اور وزیر خارجہ شیخ عبداللہ بن زاید النہیان کے ساتھ طے پانے والے معاہدے کا اعلان کیا اور اسے ’ دو برادر ممالک’ کے درمیان ایک خوش آئند پیش رفت قرار دیا۔
وزیر خارجہ نے لکھا کہ’ جھے یو اے ای حکام نے آگاہ کیا ہے کہ پاکستانی سفارتی اور سرکاری پاسپورٹس کے لیے ویزا چھوٹ کا نفاذ 25 جولائی 2025 سے یو اے ای کے تمام ہوائی اڈوں پر کر دیا گیا ہے۔’
پاکستان اور یو اے ای کے درمیان قریبی سفارتی، اقتصادی اور ثقافتی تعلقات ہیں، یو اے ای مشرق وسطیٰ میں پاکستان کا سب سے بڑا تجارتی شراکت دار ہے اور ترسیلات زر کا ایک بڑا ذریعہ بھی، جہاں پاکستانیوں کی ایک بڑی تعداد مقیم ہے اور کام کر رہی ہے۔
اسحٰق ڈار نے مزید کہا کہ’ ہم نے دونوں برادر ممالک کے درمیان سفارتی اور سرکاری پاسپورٹس پر باہمی ویزا چھوٹ پر اتفاق کیا، اور اس معاہدے کو مؤثر اور فعال بنانے کے لیے ایک مفاہمتی یادداشت (ایم او پر) پر دستخط کیے، جس کا نفاذ دستخط کے 30 دن بعد ہوگا۔’
اسحٰق ڈار کے مطابق، یہی باہمی سہولت اماراتی شہریوں کے لیے بھی پاکستان کے تمام ہوائی اڈوں پر فعال کر دی گئی ہے۔
اس ماہ کے اوائل میں یو اے ای کے وزیر داخلہ لیفٹیننٹ جنرل شیخ سیف بن زاید النہیان نے پاکستانی شہریوں کے لیے ویزا کے عمل کو تیز کرنے کے لیے ’ مکمل تعاون’ کی یقین دہانی کرائی تھی۔
یہ بیان اس وقت سامنے آیا تھا جب ان کی ملاقات پاکستانی وزیر داخلہ محسن نقوی سے ہوئی تھی۔
دورے کے دوران محسن نقوی نے ویزا پالیسی میں نرمی کی اہمیت پر زور دیتے ہوئے کہا تھا کہ’ ہم چاہتے ہیں کہ پاکستانی شہری آسانی سے یو اے ای آ سکیں، ویزا پالیسی میں نرمی پاکستانیوں کے لیے بڑی سہولت کا باعث بنے گی۔’
جون میں، پاکستان اور یو اے ای نے اسلام آباد میں منعقدہ پاکستان-یو اے ای جوائنٹ منسٹریل کمیشن (جے ایم سی ) کے 12ویں اجلاس کے دوران باہمی ویزا چھوٹ سے متعلق ایک مفاہمتی یادداشت پر دستخط کیے تھے۔
لائیو ٹی وی