کراچی: سگ گزیدگی کے واقعات میں خطرناک حد تک اضافہ، یومیہ 90 سے 100 کیسز رپورٹ
کراچی میں کتے کے کاٹے (سگ گزیدگی) کے واقعات میں خطرناک حد تک اضافہ ہوگیا، جون اور جولائی میں کتوں کی جانب سے بچوں کو کاٹنے کے سب سے زیادہ کیسز رپورٹ ہوئے ہیں۔
کراچی میں جون اور جولائی کے دوران سگ گزیدگی کے واقعات میں خطرناک حد تک اضافہ دیکھا گیا ہے، ڈاکٹرز کے مطابق اس عرصے میں سول ہسپتال میں سگ گزیدگی کے 2 ہزار 29 کیس رپورٹ ہوئے ہیں، جناح ہسپتال میں ایک ہزار 392 مریض لائے گئے۔
ڈاکٹرز کا کہنا ہے کہ سگ گزیدگی کے زیادہ تر واقعات نارتھ کراچی، سرجانی اور بلدیہ ٹاؤن سے رپورٹ ہوئے ہیں، کتے کے کاٹنے کے 24 گھنٹے کے اندر ویکیسن لگوانا ضروری ہے۔
انچارج ریبیز اینڈ ڈاگ بائیٹ سول ہسپتال ڈاکٹر رومانہ کے مطابق زیادہ تر کیسز کا تعلق بلدیہ ٹاؤن، سرجانی اور نارتھ کراچی سے ہے۔ سول ہسپتال میں یومیہ 60 سے 70 کیسز رپورٹ ہو رہے ہیں، جناح ہسپتال میں یومیہ 20 سے 30 افراد کو لایا جا رہا ہے۔
ڈاکٹر رومانہ نے کہا کہ سول ہسپتال میں ریبیز کا کنفرم کوئی کیس رپورٹ نہیں ہوا، کتے کے کاٹنے کے 24 گھنٹے کے اندر ویکیسن لگوائی جائے ورنہ ریبیز کا خطرہ ہوسکتا ہے۔
لائیو ٹی وی