ایک ہی دن میں بیٹی کے دل نے دو بار دھڑکنا بند کردیا تھا، عینی خالد نے منظرِ عام سے غائب رہنے کی وجہ بتادی
گلوکارہ عینی خالد نے انکشاف کیا ہے کہ ان کی سات سالہ بیٹی کے دل نے ایک ہی دن میں دو بار دھڑکنا بند کردیا تھا، جس کے باعث وہ کافی عرصے سے منظرِ عام سے غائب رہیں۔
عینی خالد نے انسٹاگرام پر اپنی سات سالہ بیٹی عائشہ کی ویڈیو شیئر کرتے ہوئے ایک طویل پیغام لکھا، جس میں انہوں نے بتایا کہ عائشہ کو صرف 24 گھنٹوں کے اندر دو بار دل کا دورہ پڑا، جس کی وجہ سے اس کی زندگی خطرے میں پڑ گئی تھی۔
انہوں نے انسٹاگرام پوسٹ میں لکھا کہ 23 جنوری 2024 ایک ایسا دن ہے جو ان کی روح پر ہمیشہ کے لیے نقش ہو گیا ہے، ان کی بیٹی، جو بالکل صحت مند تھی، صرف آٹھ گھنٹوں کے وقفے سے ان کے دل نے دو بار دھڑکنا بند کردیا تھا۔
عینی خالد نے بتایا کہ عائشہ کے دل کی دھڑکن اچانک خراب ہو گئی اور جسم کو آکسیجن ملنا بند ہو گئی، جس کی وجہ سے اس کے کئی اعضا نے کام کرنا چھوڑ دیا، ڈاکٹروں کو اسے زندہ رکھنے کے لیے سانس اور خون کی روانی برقرار رکھنے والی مشینیں لگانا پڑیں، جب کہ گردے صاف کرنے کے لیے ڈائیلاسز بھی کیا گیا۔
گلوکارہ نے لکھا کہ وہ بیٹی کو مشینوں میں جکڑا دیکھ کر مسلسل روتی رہیں۔
ان کے ذہن میں وہ لمحے آتے رہے جب عائشہ خوشی سے گھر میں کھیلا کرتی تھی اور اب وہ زندگی اور موت کی جنگ لڑ رہی تھی۔
انہوں نے مزید بتایا کہ ڈاکٹروں کا کہنا ہے کہ دماغ پر چوٹ لگنے کے باعث عائشہ کو ایک ایسی بیماری (Peripheral Neuropathy) ہو گئی ہے، جس کی وجہ سے وہ اب زندگی بھر چل نہیں سکے گی۔
عینی خالد نے کہا کہ بیٹی نے موت سے لڑائی لڑی، لیکن انہوں نے کبھی امید اور ایمان کا دامن نہیں چھوڑا کیونکہ جہاں دوا ختم ہو جاتی ہے، وہاں اللہ کی رحمت شروع ہوتی ہے اور ان کی عائشہ اللہ کا معجزہ ہے۔
انہوں نے مزید بتایا کہ آج عائشہ زندہ ہے، مسکرا رہی ہے، ہنس رہی ہے اور آہستہ آہستہ صحتیاب ہو رہی ہے۔
گلوکارہ کا کہنا تھا کہ وہ کافی عرصے سے منظر عام سے غائب تھیں کیونکہ وہ اپنی بیٹی کے ساتھ وقت گزار رہی تھیں، لوگ پوچھتے تھے، ’عینی، تم کہاں ہو؟‘ تو ان کا جواب یہی ہوتا تھا کہ وہ اپنی بہادر، صابر اور خوبصورت بیٹی کی ماں بننے میں مصروف ہیں۔
انہوں نے پیغام کے آخر میں مداحوں سے درخواست کی کہ عائشہ کو اپنی دعاؤں میں ضرور یاد رکھیں۔
لائیو ٹی وی