وزارت خزانہ نے رواں مالی سال بھی ضمنی گرانٹس جاری کرنے پر پابندی لگادی
وزارت خزانہ نے رواں مالی سال بھی ضمنی گرانٹس جاری کرنے پر پابندی لگادی اور وزارت کا کہنا ہے کہ پارلیمنٹ سے منظور اور طے شدہ بجٹ کے علاوہ کوئی ضمنی گرانٹ جاری نہیں ہوگی۔
ڈان نیوز کے مطابق وزارت خزانہ نے رواں مالی سال کے لیے فنڈز کے اجرا سے متعلق مراسلہ تمام وفاقی وزارتوں اور ڈویژنز کو ارسال کردیا ہے۔
مراسلے میں وزارت خزانہ کا کہنا ہے کہ ایڈہاک ریلیف الاؤنس کے لیے اضافی فنڈز فراہم کر دیے گئے ہیں۔
جاری کردہ بجٹ سے فنڈز کسی دوسرے مقصد کے لیے استعمال کیے جاسکیں گے، مختص فنڈز کسی دوسرے مقصد کے لیے استعمال کی بھی اجازت لینا ہوگی، تاہم جاری شدہ بجٹ کے علاوہ فنڈز کسی دوسرے مقصد کے لیے استعمال نہیں ہوسکیں گے۔
مراسلے میں کہا گیا ہے کہ صرف شدید قدرتی آفات کی صورت میں سپلیمنٹری گرانٹ فراہم کی جاسکے گی۔
وزارت خزانہ کا کہنا ہے کہ مذکورہ احکام اور پالیسی گائیڈ لائنز کا اطلاق رواں مالی سال کے ساتھ ساتھ آنے والے مالی سالوں پر بھی ہوگا۔
واضح رہے کہ گزشتہ مالی سال بھی وزارت خزانہ نے ضمنی گرانٹ کے اجرا پر پابندی لگائی تھی۔
لائیو ٹی وی