یمن:2ایرانی فوجی افسران کی گرفتاری کا دعویٰ

12 اپريل 2015
یمنی ملیشیا نے دو مختلف کارروائیوں کے دوران دو ایرانی فوجیوں افسران کو گرفتار کرنے کا دعویٰ کیا ہے — اے ایف پی فائل فوٹو
یمنی ملیشیا نے دو مختلف کارروائیوں کے دوران دو ایرانی فوجیوں افسران کو گرفتار کرنے کا دعویٰ کیا ہے — اے ایف پی فائل فوٹو

عدن: مقامی یمنی ملیشیا نے حوثی قبائلیوں کو مدد فراہم کرنے والے دو ایرانی فوجی افسران کو عدن کےعلاقے سے گرفتار کرنے کا دعویٰ کیا ہے۔

یہ خیال رہے کہ ایران نے یمن کے حوثی قبائل کو کسی بھی قسم کی فوجی مدد فراہم کرنے کی تردید کی ہے جبکہ ان قبائل کی پیش قدمی کو روکنے کے لئے عرب اتحاد میں شامل سعودی عرب نے ہوائی کارروائیوں کا آغاز کیا ہے۔

غیر ملکی خبر رساں ادارے رائٹرز کے مطابق اگر یمنی ملیشیا کی جانب سے ایران کی پاسداران انقلاب کے افسران کو گرفتار کرنے کی تصدیق ہوجاتی ہے تو سعودی عرب اور ایران کے درمیان حالات مزید کشیدہ ہوجانے کا خدشہ ہے۔

بندرگاہ کے حامل شہر میں حوثیوں کے خلاف لڑنے والی ملیشیا میں موجود ذرائع کا کہنا ہے کہ گرفتار کئے جانے والوں میں ایک ایرانی فوج کا کرنل اور ایک کیپٹن شامل ہے۔

انھوں نے کہا کہ انہیں دو مختلف اضلاع سے شدید لڑائی کے بعد گرفتار کیا گیا ہے۔

ذرائع کا کہنا ہے کہ ابتدائی تفتیش میں معلوم ہوا ہے کہ دونوں کا تعلق قدس فورس سے ہے اور وہ یہاں حوثیوں کے مشیر کے طور پر کام کررہے تھے۔

ذرائع کا کہنا ہے کہ ان کو ایک محفوظ مقام پر منتقل کردیا گیا ہے اور جلد عرب اتحادیوں کے حوالے کردیا جائے گا۔

ادھر سعودی عرب کی قیادت میں عرب اتحادی فوجوں کی جانب سے حوثیوں کے خلاف کئے جانے والے فضائی حملے تیسرے ہفتے میں داخل ہوگئے ہے، جن میں حوثیوں اور دیگر ملیشیا کے ٹھکانوں پر بمباری کی جارہی ہے۔

دوسری جانب مقامی شہریوں اور حوثیوں کے خلاف لڑنے والی حکومتی ملیشیا کا کہنا ہے کہ یمن کے جنوبی علاقے میں زمینی لڑائی کے دوران 20 حوثی قبائلی اور 2 ملیشیا اہلکار ہلاک ہوئے ہیں۔

شہریوں کا کہنا ہے کہ جنوبی علاقوں میں لڑنے والی ملیشیا نے عدن کے شمال میں 100 کلومیٹر دور حوثی قبائلیوں اور ملک کے سابق صدر عبداللہ صالح کی وفادار اور شمالی ملیشیا کے قافلے کو گھات لگا کر نشانہ بنایا تھا جس میں 15 شمالی ملیشیا کے اہلکار ہلاک ہو ئے۔

حوثی مارٹر شیل سے 3 سعودی فوجی ہلاک

رائٹرز کے مطابق سعودی عرب کی سرکاری نیوز ایجنسی ایس پی اے نے وزارت دفاع کی جانب سے جاری ہونے والے ایک بیان کے حوالے سے کہا ہے کہ گذشتہ روز حوثی قبائلیوں کی جانب سے سعودی عرب کے سرحدی علاقے میں مارٹر شیل سے حملہ کیا گیا جس میں سعودی عرب کے 3 فوجی افسران ہلاک ہوئے۔

وزارت دفاع کے جاری بیان میں مزید کہا گیا ہے کہ گذشتہ ہفتے ہونے والے ایک حملے کے دوران سعودی عرب کی سرحدی گارڈز کے 3 اہلکار ہلاک ہوگئے تھے۔

سعودی سرحد پر 500 یمنی جنگجو ہلاک

اے ایف پی کے مطابق سعودی عرب کی وزارت دفاع کا کہنا ہے کہ یمن میں عرب اتحادی افواج کی جانب سے جاری فضائی حملوں کے بعد سے اب تک سعودی عرب اور یمنی سرحد پر جھڑپوں کے دوران 500 یمنی جنگجو ہلاک ہوچکے ہیں۔

خیال رہے کہ عرب اتحادیوں کی جانب سے 26 مارچ کو یمن کی قانونی حکومت کی حمایت کرتے ہوئے قبائیلی جنگجوں کے خلاف شروع کئے جانے والے حملوں کے بعد پہلی بار سرکاری طور پر ہلاکتوں کے بارے میں معلومات فراہم کی گئی ہیں۔

ضرور پڑھیں

تبصرے (0) بند ہیں