موبائل فون تو آپ نے بہت دیکھیں ہوں گے مگر ایسا نہیں جو کہ یو ایس بی ڈرائیو سے بھی چھوٹا ہو۔

جی ہاں یہ ہے دنیا کا سب سے چھوٹا موبائل فون ٹینی ٹی ون، جس کی لمبائی محض 46.7 ملی میٹر جبکہ وزن 13 گرام ہے۔

اسے برطانیہ سے تعلق رکھنے والی کمپنی زینکو نے تیار کیا ہے جس کے لیے فنڈز اکھٹا کرنے کی مہم فنڈنگ سائٹ کک اسٹارٹر میں جاری ہے۔

مزید پڑھیں : دنیا کا سب سے چھوٹا 4 جی اسمارٹ فون

کمپنی کے مطابق ہمیں دنیا کا سب سے چھوٹا موبائل فون متعارف کرانے پر فخر ہے، یہ اتنا چھوٹا ہے کہ آپ کے لیے یقین کرنا مشکل ہوجائے گا کہ یہ واقعی کام بھی کرتا ہے۔

اس فون کے ذریعے کالز اور ایس ایم ایس بھیجنے کے ساتھ ساتھ 300 نمبر اور 50 ٹیکسٹ پیغامات محفوظ کیے جاسکتے ہیں۔

یہ فون 2 جی نیٹ ورک پر کام کرے گا اور ایک چارج پر تین گھنٹے لگاتار بات کی جاسکے گی، جبکہ اسٹینڈ بائی ٹائم تین دن ہے۔

اس میں 0.49 انچ کی او ایل ای ڈی ڈسپلے موجود ہے جبکہ چارجنگ کے لیے مائیکرو یو ایس بی پورٹ دی گئی ہے۔

یہ بھی پڑھیں : نیا ننھا موبائل فون جو فیجیٹ اسپنر بھی

نانو سم سلاٹ، مکمل فعال کی بورڈ اور ایک چھوٹا اسپیکر بھی اس کا حصہ ہے۔

کمپنی کے مطابق اس فون کا موزانہ کسی اسمارٹ فون سے بھی کیا جاسکتا ہے تاہم یہ بیک اپ یا ایمرجنسی فون کے لیے زیادہ موزوں ہے۔

اس فون کو کک اسٹارٹر کی سائٹ پر 35 برطانوی پونڈز (5 ہزار 2 سو پاکستانی روپے سے زائد) میں خریدا جاسکتا ہے۔