باکسنگ: محمد وسیم نے میکسیکو کے لوپیز کو شکست دے دی

اپ ڈیٹ 27 نومبر 2019
محمد وسیم نے کیریئر کی 10 ویں کامیابی حاصل کرلی—فوٹو:عبدالغفار
محمد وسیم نے کیریئر کی 10 ویں کامیابی حاصل کرلی—فوٹو:عبدالغفار

پاکستان کے پروفیشنل باکسر محمد وسیم نے کیریئر کی 10ویں کامیابی حاصل کرتے ہوئے سپر فلائی ویٹ کیٹیگری کے مقابلے میں میکسیکو کے گینگان لوپیز کو شکست دے دی۔

دبئی میں کھیلا گیا سپر فلائی ویٹ کیٹیگری کا مقابلہ 8 راؤنڈز پر مشتمل تھا جہاں ججز نے محمد وسیم کو 75 کے مقابلےمیں 77 پوائنٹس سے فاتح قرار دیا۔

محمد وسیم نے کیریئر کی 10ویں کامیابی حاصل کی —فوٹو: عبدالغفار
محمد وسیم نے کیریئر کی 10ویں کامیابی حاصل کی —فوٹو: عبدالغفار

محمد وسیم نے 13 ستمبر 2019 کو دبئی کے میرینہ باکسنگ ہال میں فلائی ویٹ باٹ باکسنگ چیمپیئن شپ میں فلپائنی باکسر کونراڈوسور کو محض 82 سیکنڈ میں ناک آؤٹ کرکے اعزاز اپنے نام کیا تھا۔

پاکستانی باکسر نے چیمپیئن شپ جیتنے کے بعد کامیابی کو مقبوضہ کشمیر کے عوام کے نام کیا تھا جہاں بھارتی حکومت نے پابندیاں عائد کرتے ہوئے پوری وادی کا لاک ڈاؤں کر رکھا ہے۔

یہ بھی پڑھیں:میں پاکستان سے کچھ نہیں مانگتا: کامیاب باکسر محمد وسیم کا قوم سے شکوہ

تاہم محمد وسیم نے وطن واپسی پر باکسنگ فیڈریشن سمیت کسی اعلیٰ عہدیدار کی جانب سے ان کا استقبال نہ کرنے پر شکوہ کیا تھا اور انہیں اعزاز جیتنے کے باوجود کرائے کی ٹیکسی پر ایئرپورٹ سے گھر روانہ ہونا پڑا تھا۔

سماجی رابطے کی ویب سائٹ ٹویٹر پر اپنے پیغام میں چمپیئن باکسر نے شکایت کرتے ہوئے کہا تھا کہ ’میں ایئرپورٹ پر اپنے استقبال کے لیے فائٹ نہیں کرتا، میں فائٹ کرتا ہوں تاکہ پوری دنیا میں پاکستان کا شان دار استقبال ہو‘۔

محمد وسیم نے کہا تھا کہ انہوں نے ہر فائٹ اور ہر ٹوور سے بہت کچھ سیکھا ہے اور ہر ٹوور دنیا کو یہ دکھانے کا موقع دیتا ہے کہ پاکستان میں باکسنگ کا ٹیلنٹ موجود ہے۔

مزید پڑھیں:پروفیشنل باکسنگ: محمد وسیم نے کیریئر کی مسلسل آٹھویں فائٹ جیت لی

بعد ازاں باکسنگ چیمپیئن نے آرمی چیف جنرل قمر جاوید باجوہ سے ملاقات کی تھی جہاں آرمی چیف نے ان کو کامیابی اور ملک کا نام روشن کرنے پر مبارک باد دی تھی۔

پاک فوج کے شعبہ تعلقات عامہ (آئی ایس پی آر) کا کہنا تھا کہ آرمی چیف جنرل قمر جاوید باجوہ نے مبارک دی اور کہا کہ محمد وسیم کی کامیابی سے پاکستان کا بیرون ملک وقار بلند ہوا ہے، محمد وسیم جیسے باصلاحیت نوجوان ملک کا فخر ہیں اور پاک فوج باصلاحیت افراد کی سپورٹ جاری رکھے گی۔

ضرور پڑھیں

تبصرے (0) بند ہیں