ڈیزائنر فہد حسین کا اپنا فیشن برانڈ بند کرنے کا اعلان

اپ ڈیٹ فروری 08 2020

ای میل

فہد حسین ملک کے مشہور ڈیزائنر ہیں—فوٹو: انسٹاگرام
فہد حسین ملک کے مشہور ڈیزائنر ہیں—فوٹو: انسٹاگرام

پاکستانی فیشن انڈسٹری سے تعلق رکھنے والے کامیاب ڈیزائنر فہد حسین نے اپنے فیشن برانڈ کو بند کرنے کا اعلان کردیا۔

اس بات کا اعلان فہد حسین نے سماجی رابطوں کی ویب سائٹ انسٹاگرام پر پوسٹ کے ذریعے کیا۔

فہد حسین نے اپنی پوسٹ میں نہایت دکھ کے ساتھ اس خبر کو شیئر کرتے ہوئے لکھا کہ 'جہاں تک مجھے یاد ہے میں اپنی پوری زندگی میں صرف فن اور فیشن پر کام کرنے کا خواہشمند رہا، ایک دہائی سے زیادہ عرصہ میں نے اس فن کو سیکھنے اور اپنا برانڈ بنانے میں لگادیا لیکن اس دوران میں نے کچھ کوتاہیوں کو نظر انداز کردیا، (تاہم) ایک فنکار ہونے کی حیثیت سے کاروبار کرنے کی صلاحیت مجھ میں نہیں تھی'۔

انہوں نے مزید لکھا کہ 'میں نے سوچا تھا کہ وقت اور وسائل میری سوچ کو کامیاب بنادیں گے لیکن افسوس کے ساتھ ہمیشہ سب ویسا نہیں ہوتا جیسا آپ چاہتے ہیں، شاید میں کاروبار نہیں کرنا چاہتا تھا، میں صرف آرٹ پر کام کرنے کا خواہشمند تھا'۔

A photo posted by Instagram (@instagram) on

ڈیزائنر کے مطابق 'میں سب کا شکر گزار ہوں کہ میرے ساتھ یہ خوبصورت لمحات گزارے، میرے برانڈ کو فخر ہے کہ اس نے اتنے کامیاب سال گزارے اور بہترین لُکس تیار کیے اور کئی خوبصورت دلہنوں کے ساتھ کام کیا'۔

فہد حسین نے بتایا کہ ان کا فیشن برانڈ دیوالیہ ہوگیا ہے اور وہ اب اسے بند کررہے ہیں، ساتھ ہی انہوں نے لکھا کہ 'وہ اپنا کاروبار ختم کررہے ہیں جبکہ وہ ایک مرتبہ پھر سب کے شکر گزار ہیں'۔

A photo posted by Instagram (@instagram) on

خیال رہے کہ فہد حسین کا شمار پاکستان کے کامیاب ڈیزائنرز میں کیا جاتا رہا ہے، تاہم ان کے اس فیصلے نے یقیناً فیشن کی دنیا میں کئی لوگوں کو حیران کردیا ہوگا۔

پاکستان کی کئی بڑی ماڈلز بھی فہد حسین کے برانڈ کے ساتھ کام کرنے کے لیے ہمیشہ تیار رہتیں تاہم اب جہاں انہوں نے برانڈ کو بند کرنے کا اعلان کردیا وہیں ڈان امیجز کو دیے ایک انٹرویو میں یہ بھی کہا کہ انہوں نے فیشن کی دنیا میں واپسی کے حوالے سے ابھی کچھ نہیں سوچا۔