انگلینڈ نے کورونا وائرس کے باعث متعارف کرائے گئے بائیو سیکیورٹی پروٹوکول کی خلاف ورزی پر انگلش فاسٹ باؤلر جوفرا آرچر کو ویسٹ انڈیز کے خلاف دوسرے ٹیسٹ میچ کی ٹیم سے ڈراپ کردیا۔

ویسٹ انڈیز کے خلاف آج سے اولڈ ٹریفورڈ میں کھیلے جا رہے سیریز کے دوسرے ٹیسٹ میچ کے لیے انگلش ٹیم کا اعلان بدھ کو کیا گیا تھا اور اس ٹیم میں آرچر کا نام شامل تھا۔

مزید پڑھیں: ویسٹ انڈین کپتان جیسن ہولڈر کی ٹیسٹ کیریئر کی بہترین رینکنگ

تاہم آج صبح انگلش کرکٹ بورڈ کی جانب سے جاری بیان میں کہا گیا کہ انہیں اسکواڈ سے باہر کردیا گیا ہے اور وہ سیلف آئسولیشن میں جائیں گے۔

بیان میں کہا گیا کہ آرچر کو پانچ دن سیلف آئسولیشن میں گزارنے ہوں گے جس کے دوران ان کا دو مربتہ کورونا وائرس کا ٹیسٹ ہو گا، دو منفی ٹیسٹ کے بعد ہی انہیں دوبارہ ٹیم کے گروہ کا حصہ بننے کی اجازت ہو گی۔

انگلش کرکٹ بورڈ کے ترجمان نے تصدیق کی کہ آرچر نے ایجز باؤل اور ایمریٹس اولڈ ٹریفورڈ کے درمیان سفر کر کے بائیو سیکیورٹی پروٹوکول کی خلاف ورزی کی۔

بورڈ نے وضاحت کی کہ فاسٹ باؤلر اپنے گھر کی جانب جاتے ہوئے راستے میں کہیں رکے تھے اور یہ حقیقت اس اسکواڈ کے اعلان ہونے کے بعد علم میں آئی۔

یہ بھی پڑھیں: کورونا وائرس پر 'الزام تراشی' کا شکار ہوا، نوواک جوکووچ

میچز میں شریک کھلاڑیوں اور عملے نے جی پی ایس ٹریکنگ ڈیوائس بھی پہنی ہوئی ہیں، کھلاڑی ہمیشہ کی طرح اکٹھا بس میں سفر کرنے کے بجائے انفرادی طور پر ساؤتھ ہیمپٹن سے مانچسٹر کا سفر کر رہے ہیں جس میں وہ شیڈول کے مطابق صرف کھانے کے لیے مخصوص مقام پر رک سکتے ہیں۔

انگلش کرکٹ بورڈ کے بیان کے مطابق ویسٹ انڈین ٹیم کو ان تبدیلیوں سے آگاہ کر دیا گیا ہے اور وہ انتظامات سے مکمل طور پر مطمئن ہیں۔

جوفرا آرچر نے اپنی غلطی تسلیم کرتے ہوئے کہا کہ جو کچھ بھی ہوا میں اس کے لیے بہت معذرت خواہ ہوں، میں نے ناصرف خود کو بلکہ پوری ٹیم اور مینجمنٹ کی زندگیوں کو خطرے میں ڈال دیا ہے، میں اس کے نتائج کو مکمل طور پر تسلیم کرتا ہوں اور بائیو سیکیور ماحول میں موجود تمام افراد سے تہہ دل سے معافی مانگتا ہوں۔

ان کا کہنا تھا کہ ٹیسٹ میچ سے باہر ہونے پر مجھے بہت تکلیف ہے خصوصاً ایک ایسے وقت میں جب سیریز میں ہمیں خسارے کا سامنا ہے، میں محسوس کرتا ہوں کہ میں نے دونوں ٹیموں کو مایوس کیا ہے اور میں اس کے لیے معذرت چاہتا ہوں۔

مزید پڑھیں: تماشائیوں کی عدم موجودگی میں کھلاڑی ایک دوسرے کی حوصلہ افزائی کریں

انگلینڈ نے آرچر کے متبادل کے طور پر کسی کو اپنے اسکواڈ کا حصہ نہیں بنایا ہے اور اب ان کے پاس متبادل کے طور پر پورے اسکواڈ میں صرف ایک کھلاڑی دستیاب ہے۔

تین میچوں کی سیریز میں 0-1 کے خسارے سے دوچار آرچر کی غیرموجودگی اس میچ میں انگلینڈ کی سیریز میں واپسی کی امیدوں پر پانی پھیر سکتی ہے۔