بولی وڈ کی ’دبنگ‘ گرل 34 سالہ سوناکشی سنہا نے خود سے 22 سال زائد العمر اور بھارتی فلم انڈسٹری کے ’شدید کنوارے‘ کہلائے جانے والے سلمان خان سے خفیہ شادی کی خبروں پر خاموشی توڑ دی۔

سلمان خان اور سوناکشی سنہا کی خفیہ شادی سے متعلق گزشتہ دو دن سے خبریں جاری تھیں، جن میں دعویٰ کیا جا رہا تھا کہ دونوں نے کچھ عرصہ قبل شادی کرلی۔

اگرچہ سوناکشی سنہا اور سلمان خان کی خفیہ شادی کی خبریں وائرل ہوئیں، تاہم ان کے درمیان کبھی رومانس کی خبریں نہیں رہیں۔

سوناکشی سنہا اور سلمان خان نے متعدد فلموں میں ایک ساتھ کام بھی کیا ہے، تاہم اس کے باوجود ان کے درمیان تعلقات کی چہ مگوئیاں کبھی نہیں رہیں، البتہ سلمان خان کی کترینہ کیف سمیت دیگر اداکاراؤں کے ساتھ تعلقات کی خبریں سامنے آتی رہتی ہیں۔

حال ہی میں جب بھارتی میڈیا میں سوناکشی سنہا اور سلمان خان کی خفیہ شادی کی خبریں وائرل ہوئی تو اداکارہ نے بھی اس پر خاموشی توڑتے وضاحت کردی.

شوبز سوشل میڈیا پیج ’بولی وڈ ٹشن‘ نے سلمان خان اور سوناکشی سنہا کی ایک تصویر شیئر کرتے ہوئے لکھا کہ خبریں ہیں کہ دونوں نے شادی کرلی۔

مذکورہ پوسٹ پر سوناکشی سنہا نے کمنٹس کرتے ہوئے شوبز پیج کو بتایا کہ کیا وہ یہ نہیں بتا سکتے تھے کہ مذکورہ تصویر جعلی ہے اور اسے ایڈٹ کیا گیا ہے۔

اداکارہ نے شوبز پیج کو کہا کہ وہ لوگوں کو یہ بھی بتا سکتے تھے کہ سلمان خان اور سوناکشی سنہا کی مذکورہ تصویر ایڈٹ شدہ ہے اور اس کا حقیقت سے کوئی تعلق نہیں۔

سوناکشی سنہا کے کمنٹس کو ہزاروں افراد نے لائیک کیا اور ان کے جواب سے اتفاق کرتے ہوئے لکھا کہ لوگوں کو جعلی خبروں کی حوصلہ افزائی کے بجائے حوصلہ شکنی کرنی چاہیے۔